也沒有顯赫的婚宴排場

期望做到的就是窩心的幸福感覺

雖然結婚之後我們就一貧如洗

一貧如洗之前，新娘子仍然要整一整靚指甲

多謝為我重出江湖客串的Abby小姐，幫我整左十隻靚指甲，仲要勁優惠價錢﹗多謝

即使我地要捱一段時間先可以經濟上鬆一口氣

但

有老大、老三、媽媽給我們大氣電波的結婚禮物

有胡先生三度求婚的承諾

我知道我們有能力去過幸福的生活

今天就是倒數最後一天，12月6日這個時侯請大家稱呼我一聲「幸福少奶奶」

我地都無立即試身，反而坐定定對望係度聽「久久久但願人長久」

一路聽一路都好感動，我好快已經失守喊到爆

當我喊緊既時候，原來胡先生都已經流眼淚....

再聽網上重播都依然好感動、依然流眼淚...

衷心再次多謝各位

小時候成日都吵吵鬧鬧

到我出身，開始工作的時候，又有段時間出街番工多過係屋企

我記得真真正正一家人好開心咁影大合照

係陳爸爸做完腦手術之後，2006年陳爸爸離開左我地之後

有一段好長的時間無真正開心過，有時大家都知道各自都好掛住佢，但好少會傾

今日四點幾既時候，我收到一份好好好感動的結婚禮物

係屋企人送比我

呢樣野大家都可以分享到

只要今個星期五，1-2pm聽商台的「但願人長久」就會知道

我要講

好多謝老大、老三，好多謝陳媽媽同胡先生；仲有Linda同銀行阿娟(阿葛，你明既)

有時我覺得自己好多唔完滿，但我知道今後的生活我可以學習接納呢d，再學去欣賞多d；多謝你地......

有時唔係一定要從大公司先買到心儀既東西

反而留心身邊一d小小的手作仔，可以更合用、更窩心、更有人情味

黎緊，係我結婚之後會join一個Big Party做義工

當然負責番我比較有經驗的cooking and food preparation、或者會做埋cooking and Jam demonstration(咁到時大家就可以見下我呢個神秘人，我好少露面係d大場合)

除左有我地負責的料理之外，今次的Fiesta會有好豐富同特色的內容

包括﹕香薰製品、手功肥皂、布藝花藝、handmade飾物、手繪畫等等......

除左去當join一個party之外，合眼緣的話仲可以買d禮物送比身邊人同朋友；而且唔係一般街外可買到的東西，大多都係人手handmade架~

如果大家有興趣想知多d，請私人留言比我~~

我番埋今日就放假喇，好爽~

感覺係咁多次放假最開心最快樂

當然因為好事近，二來已經預備好去旅行

到時希望可以睇到落雪......

雖然我會好掛住媽媽同小臻，同時我地會enjoy我地既假期

BIG DAY當天應該會有少少雲，但睇到好似會有陽光；氣溫係18-22度

仲有4日......期待......

眼見時間剩番個位數字，真係好開心

早幾日分別陪媽咪、我妹(伴娘)、胡媽媽去final fitting

尋晚同傻芬去左拎兄弟姊妹既襟花、手花

仲有小臻既花球仔、花車裝飾同車頭公仔

我一個人拎番屋企，原來我真係幾大力...

我又買左d囍字貼比媽媽，陳媽媽見到好鐘意，我估貼起哂成間屋即時好似過年咁

番埋聽日我就正式放假喇，真係好期待重獲自由(一段時間)的一刻

倒數的時間係最開心，眼見日子漸近，真係好期待我地辛苦經營年半的Big Party

好多朋友都問我緊唔緊張，其實我唔識分自己緊唔緊張，我食得訓得無咩特別，反而想果日快d到，之後去旅行......(hehe)

係嫁之前，我要努力整多幾轉嫁女餅；回禮唔可以自己整，唯有係嫁女餅度埋手~

今次用左從Oisix度訂番黎既有機豆渣粉整曲奇

我想整豆渣曲奇好耐架喇，聽聞豆渣含豐富蛋白質，而且高纖，今次仲要係Oisix有機豆渣粉，想唔健康都幾難~

你地睇~~

做法好簡單，焗到金金黃黃，出爐果刻好香的曲奇味

我信，我會encore~

雖然每塊都有不規則的裂痕，但我覺得幾好睇，裂痕唔會令到曲奇碎開

豆渣本來就無人會用，係近年d人發現佢既營養價值同想環保先令豆渣起死回生

今次既曲奇我加左烘焙過的黃豆粉，味道很日式~

出爐無耐，我就要為曲奇影相

一放低盤曲奇，小臻隻為食貓就跟住我喇~

臻﹕「大阿姨，咩黎啊？」

姨﹕「......」

我故意唔出聲，睇下佢想點~

佢開始出手喇，左揀揀、右揀揀......

揀左塊最大塊既，仲要望住我笑~

細路，咪笑騎騎放毒蛇喎......

臻﹕「我聞聞...，係幾香喎」

姨準備沒收佢塊餅，因為小臻病緊......

呵呵﹗你睇佢扮睇我唔到想偷食~

臻，我都好想比你食，等你好番先阿姨再整比你食啦~~(姨已經沒收曲奇餅，臻只可以飲水lu~)

大家想跟住做嗎？來來來...食譜在此

材料﹕Oisix有機豆渣粉30g、低根麵粉100g、烘焙黃豆粉60g、水半杯、牛油120g、黃糖80g

做法﹕

(1) 牛油置室溫放軟，與黃糖一同拌成忌廉狀

(2) 加入豆渣粉及黃豆粉，篩下低根麵粉(每次加入一種粉需徹底拌勻)

(3) 混合物會很乾很乾，此時逐少加入水，用手輕壓拌至成麵團；麵團平均分成30分及揉成小球，將小球置焗盤上稍加按壓成圖中所見的形狀；預熱焗爐180度，焗10-15分鐘直至曲奇轉金黃色即可。

小撇步﹕

(1) 曲奇出爐時會很軟，但不會瀉身，只要待曲奇稍涼就可移至餅架放涼。

(2) 曲奇涼後需立即以密實盒儲存，以免受潮；如真的受潮可於食前以160度焗5分鐘

(3) 水的份量要視乎麵團質地而定，不一定要加足半杯水，只要手感覺到能成團就要收手。

一直心思思想再買多兩盒看門口，胡先生禁止我，話驚唔用唔用又過期

呵呵~今次多得Oisix的有機長蔥，所以我大條道理去買蠔

日本直送的廣島生蠔鮮味是當然的，煮過灼過都唔算縮得好緊要，真係值得encore

Oisix直送的有機長蔥，有好重的蔥香甜味，與蠔同煮真係好味到難捨難離

一盒廣島生蠔有十二隻左右，有機長蔥兩條切段後，份量剛好~

做法唔算難，係要d時間；我洗d長蔥的時候feel到佢既生命力，係剛從田裡收割的感覺，根部充滿泥濘，由於我好怕掂到佢地，陳媽媽教我剝開長蔥的「衣」同d泥、根一齊切掉；條長蔥當堂靚仔哂~(古天樂變左做賀軍翔)

呢味菜好好味，值得再煮一次......

材料﹕日本廣島生蠔1盒(約12隻)、Oisix有機長蔥2條

芡汁﹕蠔油1湯匙、糖1湯匙、*蠔汁3湯匙、紹酒1湯匙、生粉水(生粉1茶匙、水1湯匙)

做法﹕

(1) 燒滾水，加入份量外的薑片(1片)及蔥(普通的蔥少許)，川燙生蠔1分鐘撈起瀝水備用

(2) 燒熱份量外的一湯匙油，爆香已切段的長蔥；加入芡汁(生粉水除外)煮滾，蠔回鑊輕力兜炒；試味後逐少加入生粉水煮至合適濃杰度即可。

小撇步﹕

(1) 生蠔於備用期間會繼續出水，呢d蠔汁要留起作調味之用，香好多

(2) 之前提過生粉水要先開好，埋芡時逐少加入

(3) 長蔥易斜切，今次切段覺得大舊左d，斜切會更入味、更易入口

食飽飽當然要食番個飯後果啦~

Oisix果籃內有西洋梨一大個，我同老三、陳媽媽一齊分享，真係好爽甜

雖然唔算好多汁，但呢種味道好清新，同一般香港食到既啤梨唔同

冬天的時間生果比較少，Oisix有柿子、橙、蕉...

可惜呢d我都唔鐘意食，反而對佢d糕點類更有興趣

仲係中學的時候，我最鐘意上既堂除左中文，就係家政

家政的needlework我最怕，只係鐘意煮野食果part

有一年要考試，我同我partner做左個腐皮卷

記得係拎A架，但果刻我知道高處未算高，高手大有人在

那年最高分同屬A級的，還有一位同學做的百鳥歸巢；我知道佢先係真正冠軍

但我知道我係料理方面係有天份，所以慢慢培養呢方面的興趣，工作之後仲投資係料理的工具、食材

今次又係用Oisix蔬菜籃的大紹菜做的綠油油「蔬菜雞肉卷」

果棵大紹菜我比小臻抱下，佢見到都有d驚，真係好大個

陳媽媽話有機種植係唔同d，大棵到呢......

個餡係雞柳同甘筍粒，簡單調味同做法，已經好滿足

材料﹕Oisix大紹菜葉6塊、雞柳4條、甘筍一小條

調味﹕鹽1茶匙、糖1茶匙、麻油1茶匙、生抽1湯匙、生粉1茶匙、紹酒1茶匙、胡椒粉少許

做法﹕

(1) 雞柳洗淨切粒、甘筍去皮切粒，與調味料一同拌勻醃半小時

(2) 紹菜去梗，煲滾水下份量外的鹽1茶匙及麻油1茶匙；菜葉川燙1分鐘後盛起浸冰水

(3) 菜葉攤平，將材料平分6小分，用菜葉包裹成卷，收口位向碟底；燒滾半鑊水至大滾後，隔水蒸菜卷10分鐘至雞肉熟透，即可。

小撇步﹕

(1) 為免雞肉未熟而菜葉已被蒸黃，可轉一轉做法，先將材料炒熟再包入菜卷，再煮一個芡汁(蠔油/鮑魚汁1湯匙、生粉1茶匙+水1茶匙、水4湯匙；煮滾淋面)

(2) 切去菜梗因為太硬包唔到，但菜梗位置可以清炒做另一味菜，一樣好味

Oisix菜籃仲有兩大條長蔥，我已經諗定點整，下個post見~

但有d傳統我都一定會照做，例如蒸糕、行花市、整homemade糖果小食

今年仲要包利是添~~~(未結婚既同事朋友對我好d喇~)

但今日唔係要講過年既野，但點解「年年都有」呢？

因為尋日收到Oisix的蔬茶盒，見到兩碌蓮藕，即時諗起要煮呢味野~

今日收早，一夠鐘我就去街市買排骨同柱侯醬

做法簡單非常，但平時我好少做，今次係第一次介紹呢款菜式

因為平時見到d蓮藕都好多泥，我好怕掂到佢，好似唔知點咁~

但Oisix呢隻蓮藕好乾淨，方便我呢類鐘意乾淨企理既人

食落係爽口既，唔似媽媽煲湯果隻又綿又藕斷絲連；我反而鐘意呢種口感，清新d

材料﹕Oisix有機蓮藕2條、排骨1磅

調味﹕柱侯醬1.5湯匙、水半杯、魚露1茶匙、生抽2湯匙、紹興酒1湯匙、生粉水(生粉1茶匙+2茶匙水)、薑2片

做法﹕

(1) 排骨飛水盛起備用，蓮藕刮皮切薄片

(2) 用份量外1湯匙油起鑊爆香薑片，下排骨爆炒片刻，將調味料(生粉水除外)拌勻後下鑊同煮至大滾，收至中細火煮至收汁，加入生粉水埋芡即可。

小撇步﹕

(1) 如時間不足以炆排骨至軟身，可改用肉片

(2) 調味內建議不下鹽，因柱侯醬味濃，煮至埋芡之前可先試味，再自行加減份量外之鹽份。

(3) 生粉水先拌勻，逐少加入鑊中避免一次倒進鑊中，應慢慢調較至合適的濃杰度。

見到一條banner雙眼立即發光

「登記成為電郵雜誌會員，即可得到1000日元的積分」

即將成為C9仔既我，有著數當然會有興趣知多d~

網站裡面有d係私私縮扒見到又唔捨得買既日本雞蛋、菜、蕃茄

最重要係咩呢你知嘛？係個網站有中文翻譯架，我有時行jusco見到d食材係日文都會灰灰地，都唔知佢講咩，呢度就少左呢個麻煩~~

所以就登記囉，唔複雜，幾個step就攪掂(有興趣去呢度了解多d﹕OISIX )

原來除左1000yen積分之外，仲有每週特別推界；心郁郁就訂左個菜籃同一d整蛋糕曲奇既食材；今次我訂左個中size的菜籃，比credit card果時好開心，因為1000yen積分即時扣埋，平左成千yen去買個菜籃*0*

邊個話送上門既就唔矜貴架？

上星期三訂，今日就送上門(呵呵)

上星期五收到速遞公司的電話，姨姨同送貨黎既兩個哥哥都好禮貌

約定今日7pm左右送到上媽媽屋企

小臻見到個箱好開心，好似收禮物咁

一打開個箱就連老三同陳媽媽都好開心...超勁啊~

個packing有好多蔬菜，聽日收早我決定用佢地整番幾味~

不如同大家介紹下呢~呵呵~

日本直送既大大隻蕃茄、好似剛收割番黎既大根、菠菜、蓮藕、舞茸、日本蕃薯

仲有豆渣粉、蜜糖牛油(用黎整曲奇、muffin、蛋糕，一定好香好好味)

呢袋野係咩呢？你地估下......

3

2

2個半

1

開估

係用黎包住我六隻日本雞蛋既保護紙

好細心，一隻蛋都無爛到......

有佢地，我既嫁女餅唔好味都幾難~

好期待用佢地整出黎既料理，唔知會唔會唔同d呢~~

後記﹕上個禮拜訂左先收到通知優惠yahoo blogger，訂菜籃額外減多2000yen；今日收到enews，25/11訂今期有機蔬菜組合(中size，即係我訂呢隻)即減1000yen，有限quota架。

只需要係最後落單頁面的「詢問，備註，Campaign Code」欄填入活動代碼1000日元就得架喇，睇黎我好快會整哂呢盒菜，但要honeymoon完番黎先可以再訂lu~

尋晚send哂比同事，好多都回應話好sweet、好靚

要多謝攝影師simon的用心拍攝

更要多謝藝術家拍硬檔幫我design

仲要攪埋ecard sending的安排

十萬個多謝

晏d，晏d我會upload囍帖同ecard上黎比大家睇~

尚有2星期就係我地的BIG DAY

眼看好多野已經ready，但心仍然十五十六，好似好多野未完成咁

我信只有過左BIG DAY之後，呢種感覺先會平伏落黎

以過來人的身份，如果你性格趕急又要求高的話

奉勸各位打算結婚的朋友，千萬不要將婚期訂得太後

由胡先生求婚到依家，已經有年半的時間

原以為時間多d好做野，實際上會有好多變數；時間越多、變數越多

而且好多野唔可以太早預備

我地同一年買樓，但加加埋埋都係九個月時間完成

所以大約半年至九個月時間，我覺得好perfect

原本想自己親手整回禮禮物，但受到好多人的禁止

因為婚前幾日好多野攪，佢地要我休息都唔可以攪咁多野

但實在好希望可以為自己的婚禮做一點什麼(唔整回禮禮物，我就喪整嫁女餅~)

所以在未能自製回禮禮物的情況下，我搵左Bonnie幫手

無錯，係Yveskitchen的Bonnie

上星期我地約左係小屋見面傾回禮禮物的樣式同試味

尋日收到demo相片我仍有idea想改一改

始終一生人一次，加上要求高的我，今次真係辛苦Bonnie

希望最終出黎既效果令大家都鐘意啦~

不過真係多塵到暈，唔知係邊度黎架~

要再勤力d抹屋先得了~

胡先生今晚去飲順便派帖，執完屋就趕貨整盒貝殼蛋糕比佢請朋友食

又一次homemade嫁女餅

聽胡先生講一放低盒蛋糕去比人情，再番轉頭剩番三件

好開心佢既朋友鐘意食我既蛋糕

仲聽聞有朋友想黎我地度，order甜品

會唔會如胡先生所願，遲下要開間甜品蛋糕店呢？

今晚又話回暖？仲凍過尋晚......

希望結婚果日暖番d同晴天啦，要掛晴天公仔了~

在天氣凍的時候做咩係最適合呢？

除左暖在被窩冬眠之外，開焗爐整蛋糕曲奇也是一個好主意

特別係凍又落雨的天氣，焗爐仲可以幫我整乾d毛巾仔

本來想整夏威夷果仁曲奇，因為...所以轉做呢款咖啡貝殼蛋糕

呢款蛋糕仔可以用沙拉油/橄欖油代替牛油溶液

所以就算...都可以整到

...即係咩呢？...即係牛油解唔切凍囉~^.^~

多謝傻芬幫我整左個logo公仔，以後可以放係相度喇~

材料﹕蛋2隻、黃糖40g、低根麵粉65g、咖啡粉8g、泡打粉2g、云尼拿油1/4茶匙、牛油溶液40g

做法﹕

(1) 蛋+糖拌勻，加入云尼拿油拌勻

(2) 粉類篩進步驟(1)拌至不見粉粒，最後加入牛油溶液拌成蛋糕漿

(3) 預熱焗爐170度，蛋糕漿注入貝殼蛋糕模至6分滿，焗10分鐘至蛋糕熟即可。

小撇步﹕

(1) 我用橄欖油代替牛油溶液，質地仲係非常鬆軟

(2) 焗爐個個爐火都唔一樣，大家要睇火啊~