今晚因為巨爵，我早了少少回家就見到陳媽媽在預備釀青椒(十個開心)

媽媽自己較個魚肉的味，好香pepper的味道、一d都唔腥

媽媽好用力攪d魚肉直至起膠，先方便釀入青椒

好翠綠的青椒

媽媽話咁快就釀哂，一煎就香滿屋喇~

好味到不得了啊~

難得今日煮大餐，就給大家看幾款好味小菜吧

鮑汁螺片燴生菜

花膠瑤柱

菠蘿排骨

其實仲有一味豉油皇蝦look，可惜掛住食無影相

每個人都有自己媽媽的味道，我們要讓回憶把味道留著

唔通大家都好想知生胡椒點整？

好﹗就因為咁，我同陳媽媽合作整左呢個生胡椒炒雞扒

你咪睇我手震震以為我年紀大(我年紀都唔細既~)

係因為我......我我我......我頭先中d胡椒啊

生胡椒果篇有blogger問我點樣整d胡椒，我都講過下架喇

用研磨(好似石磨咁架，上海街有售)中碎d胡椒

又或者好似我咁無呢樣野既，用個麵棍將d胡椒係碗度中中中中中爆佢~

唔係我粗魯(我的確好唔斯文)，而係唔中佢唔出味架(出爐鐵一樣、唔打唔得架)

陳媽媽預先醃左d雞扒(唔好問我點醃、用咩醃，我唔知架，放工番黎就已經醃ed)

熱油爆香胡椒碎(加一兩條無中過既做decor)，加入雞扒兜炒至熟就ok喇~

我話比大家知，之後一連兩餐陳媽媽都用生胡椒整蝦啦、雞扒again啦啦啦啦~

好好好好好味，味辛不辣，大家都試下呃~

媽媽話想整左黎食，為免浪費所以我決定交d蟹比陳媽媽

結果？

食得架食得架，我幫媽媽將d蟹樸生粉時

真係比d蟹嚇親啊，佢地軟dei dei又好似就黎斷咁......

但炸完就同出面食既一樣，只係我敢講句，我以後都唔會買番黎整架喇~

有d野係要比錢人整既......炸物係其中一樣

同場加映大大大平平平芒果一大個

我話你知，$20@ 4個仲要大過部htc真係唔係成日有

整d咩食好呢？定係就咁食左佢好d呢？

不如整芒果布甸呃......

再黎同場加映part 2

唔知咩糕，又係九龍城的手信

好味，$6一盒9件

in in un un咁，唔重椰味，我估係斑蘭糕，0岩我食啊~

豆角炒蛋就是這樣的一道料理

細個既時候，有呢味送我就會歡天喜地

要知道整呢一味野陳媽媽真係皇者

我出面食過既都唔夠佢整得好食，可能感情分都係重要既因素啦

媽媽話依家d菜心唔好食，豆角同瓜就靚仔喇

$3一大扎，分兩餐炒都仲得

另一味送我見到都會拍手架，就係好味豆腐

點解叫好味豆腐？唔知點叫好，好好味既豆腐就叫好味豆腐囉

呢個世界既野唔係樣樣都有得解既

你睇幾靚仔......

陳媽媽，你是最好的，你知道嗎？(請用國語，見陳媽媽一次講一次)

咳到天荒地老死去活來的個多月來，陳媽媽不辭勞苦隔幾日一次湯

呢次仲要加左媽媽話係神仙(我唔信有呢樣野)食既天生雪蓮(我既內傷有得救喇，白痴無得救)

呢......你咪以為佢個樣似碌葛就睇佢唔起啊~(無人睇佢唔起啊~)

佢係天生雪蓮，好多地方都有得賣

生食好甜好爽好順喉，喉嚨痛既食左好快就無咁痛喇(仙丹？﹗)

煮左湯之後就d湯甜哂，佢就捨身取義咁成為你地眼前果碌葛喇

拿拿拿......唔係我賣口乖

我唔食苦瓜架，但陳媽媽炒既苦瓜蛋我真食到停唔到口

原本我連呢樣都唔食架，但老三話有益止暗瘡，陳媽媽話唔苦架

一食就愛上了......

因為方便易整又好味

好似尋晚咁，佢就施展一朝極速醃雞中翼既拿手好氣

老三都話好味到不得了

加上用焗爐整，無哂油但肉好嫩

出爐之前我比d蜜糖去焗多陣，好味過KFC果d啊~

我見媽媽都係用鹽、白胡椒、糖、生抽、薑汁咁去醃，份量都係唔好問佢老人家喇，你知啦，阿媽係無食譜無份量，係隨意自己鐘意架嘛......

陳媽媽同老三都好似好鐘情於佢，久不久晚餐就會有炒年糕

唔知點形容好，又唔知佢點樣炒出黎，總之就係陳媽媽炒年糕啦

陳媽媽話佢好難講出樣送點樣整出黎，什麼幾多tablespoon鹽啊糖啊油啊呢樣啊果樣啊，佢完全唔會講到，呢樣先係我同老三都寫個「服」字既原因

你知道嗎？我地好多時都要睇食譜煮野

惟有d媽媽，佢地既食譜係無字天書，唔知點樣就煮到好送一大碟，你都咪話唔厲害

可惜臻臻已回家去了，老三在廚房嚷著「有好野食~」

我打開飯煲(無錯，係飯煲)看到陳媽媽煮的糖水

似豆漿、白果已煮得好稔......好有媽媽的味道

有媽媽真好﹗

媽媽話係報紙見到有一間酒家，將呢道菜賣四十幾蚊

週日早上去買菜的時候，遇上$10/2包的蘆筍BB，又想起這道菜

心血來潮就整左出黎

雖然我地未食過酒家這道菜的味道，但單看賣相已經覺得陳媽媽好厲害

加上味道鹹香爽脆，我覺得好捧好捧呢......

陳媽媽光看了報紙的介紹就已經做得出色，好厲害呢~(比d掌聲佢﹗)

隨便炒飯係我改既~

點解？

因為陳媽媽炒飯的配料經常性係隨意得很、見到咩就炒咩，但係好味到不得了架﹗

你睇~~

我要講一講，本來呢碟炒飯係唔存在架~

如果唔係大年初二慢我兩老表話「魚媽，唔夠飯」

陳媽媽唔會再煮多三乜米，最後一碗都無人食(兩老表真抵打)

最後，陳媽媽為左清左d冷飯，就煮炒飯我地食啦﹗

我特別要求加d薑末去炒，因為天氣凍，食d薑飯暖胃(好似d阿嬤咁~)

同場加映﹕桂花糕(又係用阿姨的果凍模)

好香桂花味~~

不過今日食左陳媽媽的愛心晚餐，個人當堂暖哂~

好快就過年，陳媽媽話要起勢清雪櫃，之後要快手買年貨喎

據我所知，今年初二團拜，陳媽媽決定下午來一個豐盛的小食

等一眾親朋好友唔會食年糕食到悶，仲可以一邊耍樂、一邊食食食

有見及此，清雪櫃的任務我地係義不容辭既~

see......今晚我地好豐富既清雪櫃大餐~

魚肚素翅羹~陳媽媽整到好似碗仔翅咁~

陳媽媽無用生粉水抹冬菇，但一樣咁令身~

喂~又係呢味啊~不過今次有豬皮......(個人認為可以再辣d)

仲有驅寒的薑湯桂花丸子(桂花係我自己加入去既~hehe)

明日預告﹕檸檬紅茶凍(咁凍都仲整果凍？係啊，咁我想食嘛~)

計南乳雞翼之後，豉油雞翼係另一個必點系列

雖然好多地方都可以食得到

但媽媽的味道係獨家架~

每個屋企的媽媽即使煮野食有幾唔耍家，都總有一款係獨家

無論幾時食都會有一種份外親切的味道，哪怕係加蛋的出前一丁，對嗎？

記得一個教班的下午，同學生睇一齣短片

裡面講到一個做裁縫的爸爸唔想個仔大個之後行佢條舊路，成為一個窮裁縫

所以一直都唔支持果個好有天份的仔圓夢

最後更帶佢個鐘意做衫鐘意到行為有d怪異的仔去睇心理醫生

醫生的建議雖然有d莫名其妙，因為個仔話如果老豆著多d西裝就好，所以就建議爸爸多著西裝；最攪笑係爸爸真係大熱天時著住件西裝，足足兩個月......

呢個故事可能對大家黎講無咩意思，但我同學分享既係......

天下的父母心入面都係愛鍚子女既，只係可能唔識表達，或者用錯方法去表達

阿芝的「五星級的家」入面的苦公(苦榮小苦妹的公公)講過「仔啊女啊，呢個世上無天生的父母，佢地都係學緊做，就好似你地學做人一樣。」

邊個都想人地比機會、欣賞同認同嘛。

父母的生命唔一定會比我地長，今晚試下係父母訓著之後，靜靜去望下佢地，你會發現佢地的勞心勞力已經係佢地髮鬢、臉頰已留低難以磨滅的痕跡......

你地相信嘛，即使我呢班學生係其他人的眼中係幾咁曳、幾咁唔聽話、幾咁為世所不容；但佢地都錫佢地的屋企人，會愛錫家人的人壞極有個普......

唔知點解咁多嘮叨，有時都會覺得陳媽媽長氣又鐘意攪攪陣，但一想起媽媽為我地辛勞左大半世，就應該好好愛鍚佢，連陳爸爸的份一起愛鍚佢......

天冷喇，朋友，你今晚有無攬下你的屋企人啊？

你睇...係燕窩黎架~

好香的蛋白味，加上淡淡的冰糖甜蜜，實在係幸福的媽媽味

回來之後，我買左d我同陳媽媽都好鐘意食既 ---- 糯米包

係Taste買~$10@ 3個~抵啊~

陳媽媽加埋d青瓜、粟米仔、雞脾肉、木耳，同年糕炒一炒

就成為我美味的晚餐喇﹗

食完飯，陳媽媽仲打左個橙做橙汁比我，好幸福哦~!

我都唔執輸，醒佢食許記芒撈(佢地企硬唔減價，仲貴左添)

我好鐘意呢個雪球，好味啊~