倒數的時間係最開心，眼見日子漸近，真係好期待我地辛苦經營年半的Big Party

好多朋友都問我緊唔緊張，其實我唔識分自己緊唔緊張，我食得訓得無咩特別，反而想果日快d到，之後去旅行......(hehe)

係嫁之前，我要努力整多幾轉嫁女餅；回禮唔可以自己整，唯有係嫁女餅度埋手~

今次用左從Oisix度訂番黎既有機豆渣粉整曲奇

我想整豆渣曲奇好耐架喇，聽聞豆渣含豐富蛋白質，而且高纖，今次仲要係Oisix有機豆渣粉，想唔健康都幾難~

你地睇~~

做法好簡單，焗到金金黃黃，出爐果刻好香的曲奇味

我信，我會encore~

雖然每塊都有不規則的裂痕，但我覺得幾好睇，裂痕唔會令到曲奇碎開

豆渣本來就無人會用，係近年d人發現佢既營養價值同想環保先令豆渣起死回生

今次既曲奇我加左烘焙過的黃豆粉，味道很日式~

出爐無耐，我就要為曲奇影相

一放低盤曲奇，小臻隻為食貓就跟住我喇~

臻﹕「大阿姨，咩黎啊？」

姨﹕「......」

我故意唔出聲，睇下佢想點~

佢開始出手喇，左揀揀、右揀揀......

揀左塊最大塊既，仲要望住我笑~

細路，咪笑騎騎放毒蛇喎......

臻﹕「我聞聞...，係幾香喎」

姨準備沒收佢塊餅，因為小臻病緊......

呵呵﹗你睇佢扮睇我唔到想偷食~

臻，我都好想比你食，等你好番先阿姨再整比你食啦~~(姨已經沒收曲奇餅，臻只可以飲水lu~)

大家想跟住做嗎？來來來...食譜在此

材料﹕Oisix有機豆渣粉30g、低根麵粉100g、烘焙黃豆粉60g、水半杯、牛油120g、黃糖80g

做法﹕

(1) 牛油置室溫放軟，與黃糖一同拌成忌廉狀

(2) 加入豆渣粉及黃豆粉，篩下低根麵粉(每次加入一種粉需徹底拌勻)

(3) 混合物會很乾很乾，此時逐少加入水，用手輕壓拌至成麵團；麵團平均分成30分及揉成小球，將小球置焗盤上稍加按壓成圖中所見的形狀；預熱焗爐180度，焗10-15分鐘直至曲奇轉金黃色即可。

小撇步﹕

(1) 曲奇出爐時會很軟，但不會瀉身，只要待曲奇稍涼就可移至餅架放涼。

(2) 曲奇涼後需立即以密實盒儲存，以免受潮；如真的受潮可於食前以160度焗5分鐘

(3) 水的份量要視乎麵團質地而定，不一定要加足半杯水，只要手感覺到能成團就要收手。

不過真係多塵到暈，唔知係邊度黎架~

要再勤力d抹屋先得了~

胡先生今晚去飲順便派帖，執完屋就趕貨整盒貝殼蛋糕比佢請朋友食

又一次homemade嫁女餅

聽胡先生講一放低盒蛋糕去比人情，再番轉頭剩番三件

好開心佢既朋友鐘意食我既蛋糕

仲聽聞有朋友想黎我地度，order甜品

會唔會如胡先生所願，遲下要開間甜品蛋糕店呢？

今晚又話回暖？仲凍過尋晚......

希望結婚果日暖番d同晴天啦，要掛晴天公仔了~

在天氣凍的時候做咩係最適合呢？

除左暖在被窩冬眠之外，開焗爐整蛋糕曲奇也是一個好主意

特別係凍又落雨的天氣，焗爐仲可以幫我整乾d毛巾仔

本來想整夏威夷果仁曲奇，因為...所以轉做呢款咖啡貝殼蛋糕

呢款蛋糕仔可以用沙拉油/橄欖油代替牛油溶液

所以就算...都可以整到

...即係咩呢？...即係牛油解唔切凍囉~^.^~

多謝傻芬幫我整左個logo公仔，以後可以放係相度喇~

材料﹕蛋2隻、黃糖40g、低根麵粉65g、咖啡粉8g、泡打粉2g、云尼拿油1/4茶匙、牛油溶液40g

做法﹕

(1) 蛋+糖拌勻，加入云尼拿油拌勻

(2) 粉類篩進步驟(1)拌至不見粉粒，最後加入牛油溶液拌成蛋糕漿

(3) 預熱焗爐170度，蛋糕漿注入貝殼蛋糕模至6分滿，焗10分鐘至蛋糕熟即可。

小撇步﹕

(1) 我用橄欖油代替牛油溶液，質地仲係非常鬆軟

(2) 焗爐個個爐火都唔一樣，大家要睇火啊~

每日望住個月曆就會諗番呢年半既經歷

老實講，預備結婚既朋友大多數可能同我地一樣

唔開心多過開心

實在有太多事唔到我地話事，錢用到倒水咁已經唔在講，預計到有d使費真係唔滴汗都唔得

我地好少為錢而有爭執，反而係一d生活瑣事、習慣上有唔少既磨擦

我好幸福，因為胡先生好順得人；所以多數有意見既係我......

多得胡先生既體諒、身邊好友既支持、家人既十卜；我先可以撐到今日

更加幸福的是，最後呢個幾月我感受到一些期待的快樂

可能日子越近，我發現好多野都可以settle喇，所以可以放手等自己唔好咁緊張

(都唔係唔緊張既，心情好但胃口差，可能都係緊張同壓力所致；都好既，當減肥囉)

最後呢十幾日我都係心情好時整下嫁女餅請客等自己轉移下視線、分散注意力

今晚整左mini咖啡杯子蛋糕w/chocolate chips

我好快手連整帶焗都係大半個鐘

因為我整mini size，一次過焗左十幾個

入哂盒好似好震撼咁

希望收到既人都食得開心啦~

知道有朋友想跟著試做看看，就請參閱以下食譜吧

材料﹕蛋2隻、黃糖80g、淡奶40g、低粉120g、泡打粉4g、咖啡粉(3合1)半包，約1湯匙、朱古力粒適量、牛油溶液30ml

做法﹕

(1) 蛋及糖拌勻，加入淡奶攪拌好

(2) 篩入低粉及泡打粉拌至不見粉粒，加入咖啡粉及牛油溶液拌至滑身

(3) 注入焗杯約半滿，在面頭放上朱古力粒，以180度焗15-20分鐘即可。

小撇步﹕朱古力粒應放在正中央及稍為按入，因烘焙時蛋糕會升高及外瀉

真的好想打個邊爐、暖在家裡看宮心計(haha)

出外走走，不難發現大街小巷、大小的商場都滿佈聖誕裝飾

就快到聖誕節，今年聖誕會否不一樣？

好事當然係一不離二架啦~

所以襯星期日好少少無咁忙，就快手整番d嫁女餅招呼朋友同事

今次整多d，留番d比媽媽(佢嫁女點可以無餅食？食餅有餅味......)

好鐘意呢種效果，我唔係用PS執架，係影既時候自己做既效果

真係下次自拍都要用呢招，當堂靚哂~

比番個真身大家睇下，今次整三款曲奇(兩款比較成功、另一款就未必人人0岩食)

(左)榛子曲奇、(中)Mocha chip、(右)小饅頭

小饅頭失手，焗到爆開(唔知以為笑口棗，聖誕未過就新年喇？)

不過味道唔差既，平實既甜味(唔會過甜，但唔係好味到停唔到口果種)

而榛子曲奇一向都係水準作，我唔擔心，但佢只係排第二......

咁第一位好明顯架啦~唔係要問啊？？

最受歡迎男歌手﹗唔係古巨基，係佢﹗

好期待啊，期待d咩？遲下你就知.....呵呵

pack好哂成座山咁~

後期我再焗多一袋栗子饅頭比胡先生

希望胡先生既好同事喜歡......

籌備結婚既過程中，我好明白太多野唔到我地控制、我地話事~

但嫁女餅呢範野，我好有信心自製應該難唔到我

早幾日拜託阿仔同藝術家幫我拎餅請同事食

尋晚我就開工整第一轉既嫁女餅

我用番人地餅家既禮餅裝住，好似好勁咁款~

其實煎左十幾個，拎左d比胡先生同佢打氣、留起左一隻比老三做點心、又煎左一片比陳媽媽tea time

因為個pan有d問題，煎得唔算好好，但正因為咁我放更多心機去煎每一片餅；結果我覺得係見得人既，當然仍然有進步空間，只希望收禮既收到我想感謝佢地為我同胡先生高興既心意

我自己都食左一件，好味喎~(自己讚自己)

紅豆，綿密而且清甜；餅皮我加入蜜糖、黑糖，清甜而甘香

好好好喜歡呢份沉實既韻味

但願仍有時間去享受接著的24天，朋友，唔駛擔心我花時間去做嫁女餅，因為我十分享受這個過程呢~

今個星期六會傾回禮禮物既安排，希望順利做到合心儀既sample

心裡頭很希望為媽媽做一些點心，蒸糕是媽媽最愛的糕點

手頭上只有黑糖，就來個黑糖蒸蛋糕好了

媽媽，請快點回來

你女兒很想你哦~~~

呢個做法好易，見屋企用剩左包鬆餅粉就順手清貨，無鬆餅粉既可以每120g低粉+4g泡打粉就可以喇~

係焗緊既時候就知道好味，濃香的咖啡味、撐得飽飽滿滿的外表，如果唔係焗完已經十一點幾我會食一小口嚐一嚐(少食多滋味嘛)

材料﹕鬆餅粉100g、糖50g、牛油50g、咖啡粉2大匙、熱水2大匙、蛋2隻

做法﹕

(1) 牛油置室溫軟化後加糖拌勻，蛋先打散後分兩次加入攪勻

(2) 咖啡粉以熱水開溶

(3) 鬆餅粉分兩三次加入步驟(1)以孤寒刮切拌至不見粉粒，最後加入步驟(2)拌勻

(4) 預熱焗爐170度，將麵糊注入小鬆餅杯至半滿，焗15分鐘左右至熟即可。

小撇步﹕

(1) 這個食譜用牛油量不多，建議照食譜用，這是我亂試出來的份量，感覺會比較不膩而且健康

(2) 咖啡粉我選用咖啡豆磨成顆粒狀，而不是即沖的；香味更濃

一個好男仔同一個好女仔，係應該有一個好結局

呢句係由心而發既感言

記得舊年好男仔生日，我地一班朋友誠心希望來年佢會有個伴

願來人地生日幫人地許願，係會實現架﹗﹗﹗

今年好男仔遇上好女仔，走在一起~~(好多個心心係佢地後面轉圈~)

好女仔尋日牛一，為左齊賀佢、天生一對~

我就趕工趕起左個蛋糕

雖然唔好睇，但好味啊~

最重要心意嘛﹗下年，再下年，再再下年，希望都可以見證你地甜到漏既幸福

同事Big問我是否專攻甜點料理，其實我沒有特別取向

家常小菜會做、曲奇蛋糕小點心會做、中式糕點也會嘗試、當然雪糕雪葩果凍係走唔甩架喇；只係我喜歡隨心情去做，一有壓力、味道就會變

今天晚上涼涼的，很想做曲奇；但原本預備做的凍切曲奇要用上雞蛋，家中的雞蛋缺貨；臨時轉陣自創一款「大膽曲奇」

哈﹗大膽因為材料份量是我隨意加、隨意調較；味道帶薄薄的咖啡香、口感外脆內軟，不喜歡牛油的你可以轉用菜油/生油都可以。

大膽也是因為你夠膽跟我呢個食譜去做曲奇，口感是按我喜好去處理，希望你都喜歡這份偶爾的膽大妄為......

材料﹕燕麥片100g、鬆餅粉100g、糖50g、油50g、奶80ml、提子20g、杏仁片20g、3合1咖啡粉2湯匙、可可粉1湯匙

做法﹕

(1) 糖及油拌勻，按次序加入奶、鬆餅粉+咖啡粉+可可粉、燕麥片、提子及杏仁片

(2) 預熱焗爐170度，用手將曲奇團分成18個小球，焗至表面金黃即可。

小撇步﹕

(1) 曲奇團會比一般的團較鬆散，只要用手搓曲奇球的時候稍為用力捏出形狀就不會散開。

(2) 建議小球可以捏高身一點，因為烘焙時曲奇會稍微瀉開少少，但不會山泥傾瀉一樣，放心。

(3) 鬆餅粉、咖啡粉及可可粉要事前過篩

(4) 燕麥片我用珍寶size，係二記買；提子及杏仁片份量可以隨個人喜好加減，或轉為入爐朱古力粒也可以。

(5) 這款曲奇剛出爐時很軟身，放涼一點就會外脆內軟；一放涼就要入樽，否則受潮就失去口感。

其實我自己都好想食，實在係太香，而且質地感覺好綿密

今次再焗呢隻蛋糕，我轉用yogurt唔用whipping cream

只係想試個質地會有咩變化

最後係...超綿、超鬆軟﹗﹗﹗(而且無咁肥~健怡芝士蛋糕)

好輕好綿密的質感..

加上蛋糕面既sour cream、redcurrant

實在係無語倫比的好味~

因為在難得可以多睡片刻的假期日子，有朋友義不容辭地幫忙

除了感激義氣仔女外，還要感恩在這個非常時間能夠有好人相助(感謝主)

本來想要做豬肉乾，點知尋日收工去到supermarket都已經無哂之六

只好轉陣做蛋糕，希望好食啦(份量只夠兩個蛋糕，我無試食過)

呢個送比may老師，一位好人到不得了的大師傅

但我未能掌握這位認識不久的大師傅口味，所以做了穩陣的朱古力榛子碎蛋糕

蛋糕面的redcurrant同龍珠果一來是用作點綴、二來可平衡蛋糕的甜味

呢個送比陳生陳太，義務司機、義務統籌、義務貼身專員

我改用左苦甜的咖啡朱古力豆來裝飾，令蛋糕朱古力味更濃郁

加上我既專屬絲帶，令到平凡的小蛋糕high左dd~

此糕只應好人有，希望收禮的朋友都鐘意呢份小心思

傻芬是一位很好很好的朋友，認識至今已不經不覺踏入第四年

這位「順得人」總是令我感到很窩心

我甚少主動聯繫朋友，傻芬卻是經常一隊人出出入入(係一隊，有成十幾位)

記得在認識胡先生之前，有一個night shift的晚上，跟傻芬邊工作邊傾計，突然跟我說其實很想我可以跟她們一起玩；我知道傻芬是想我更open up自己、認識多d朋友

這份心意怎能不叫人感動呢？(雖然當時人可能已經忘記了，哈~)

但凡我有任何新出品，她都是no.3支持我既人(no.1是陳媽媽、no.2是胡先生)

除了經常被點名order的茶葉蛋外，傻芬真係傻架，佢order左個中秋蛋糕

就係呢個囉~

傻芬，你真係傻架~~

第一次買到龍珠果同redcurrant，真係為左你而買架~

可能我都係傻架~

嘩，你睇下加左我條專屬絲帶

成件事立即pro哂~

傻芬，收野喇~

懷著戰戰兢兢的心情，將呢個生日蛋糕拎去老麥

點解係老麥？因為今年托臻臻的福氣，我地可以去老麥開生日會喇喇喇

由於尋日早上仲要番工，decor的部份就留待下午加工喇~

好在買到臻臻最鐘意食既士多啤梨，加埋老三精心炮製的卡通曲奇

我覺得真係幾好樣喎~

味道係good既~

唔漏、出面少d食到的口味

我整呢款mousse cake係因為今次係有小朋友食，而且唔駛用上生雞蛋，對用家黎講比較合適吧~

希望臻臻快高長大、乖乖地、唔好成日發老脾~~