一直心思思想再買多兩盒看門口，胡先生禁止我，話驚唔用唔用又過期

呵呵~今次多得Oisix的有機長蔥，所以我大條道理去買蠔

日本直送的廣島生蠔鮮味是當然的，煮過灼過都唔算縮得好緊要，真係值得encore

Oisix直送的有機長蔥，有好重的蔥香甜味，與蠔同煮真係好味到難捨難離

一盒廣島生蠔有十二隻左右，有機長蔥兩條切段後，份量剛好~

做法唔算難，係要d時間；我洗d長蔥的時候feel到佢既生命力，係剛從田裡收割的感覺，根部充滿泥濘，由於我好怕掂到佢地，陳媽媽教我剝開長蔥的「衣」同d泥、根一齊切掉；條長蔥當堂靚仔哂~(古天樂變左做賀軍翔)

呢味菜好好味，值得再煮一次......

材料﹕日本廣島生蠔1盒(約12隻)、Oisix有機長蔥2條

芡汁﹕蠔油1湯匙、糖1湯匙、*蠔汁3湯匙、紹酒1湯匙、生粉水(生粉1茶匙、水1湯匙)

做法﹕

(1) 燒滾水，加入份量外的薑片(1片)及蔥(普通的蔥少許)，川燙生蠔1分鐘撈起瀝水備用

(2) 燒熱份量外的一湯匙油，爆香已切段的長蔥；加入芡汁(生粉水除外)煮滾，蠔回鑊輕力兜炒；試味後逐少加入生粉水煮至合適濃杰度即可。

小撇步﹕

(1) 生蠔於備用期間會繼續出水，呢d蠔汁要留起作調味之用，香好多

(2) 之前提過生粉水要先開好，埋芡時逐少加入

(3) 長蔥易斜切，今次切段覺得大舊左d，斜切會更入味、更易入口

食飽飽當然要食番個飯後果啦~

Oisix果籃內有西洋梨一大個，我同老三、陳媽媽一齊分享，真係好爽甜

雖然唔算好多汁，但呢種味道好清新，同一般香港食到既啤梨唔同

冬天的時間生果比較少，Oisix有柿子、橙、蕉...

可惜呢d我都唔鐘意食，反而對佢d糕點類更有興趣

仲係中學的時候，我最鐘意上既堂除左中文，就係家政

家政的needlework我最怕，只係鐘意煮野食果part

有一年要考試，我同我partner做左個腐皮卷

記得係拎A架，但果刻我知道高處未算高，高手大有人在

那年最高分同屬A級的，還有一位同學做的百鳥歸巢；我知道佢先係真正冠軍

但我知道我係料理方面係有天份，所以慢慢培養呢方面的興趣，工作之後仲投資係料理的工具、食材

今次又係用Oisix蔬菜籃的大紹菜做的綠油油「蔬菜雞肉卷」

果棵大紹菜我比小臻抱下，佢見到都有d驚，真係好大個

陳媽媽話有機種植係唔同d，大棵到呢......

個餡係雞柳同甘筍粒，簡單調味同做法，已經好滿足

材料﹕Oisix大紹菜葉6塊、雞柳4條、甘筍一小條

調味﹕鹽1茶匙、糖1茶匙、麻油1茶匙、生抽1湯匙、生粉1茶匙、紹酒1茶匙、胡椒粉少許

做法﹕

(1) 雞柳洗淨切粒、甘筍去皮切粒，與調味料一同拌勻醃半小時

(2) 紹菜去梗，煲滾水下份量外的鹽1茶匙及麻油1茶匙；菜葉川燙1分鐘後盛起浸冰水

(3) 菜葉攤平，將材料平分6小分，用菜葉包裹成卷，收口位向碟底；燒滾半鑊水至大滾後，隔水蒸菜卷10分鐘至雞肉熟透，即可。

小撇步﹕

(1) 為免雞肉未熟而菜葉已被蒸黃，可轉一轉做法，先將材料炒熟再包入菜卷，再煮一個芡汁(蠔油/鮑魚汁1湯匙、生粉1茶匙+水1茶匙、水4湯匙；煮滾淋面)

(2) 切去菜梗因為太硬包唔到，但菜梗位置可以清炒做另一味菜，一樣好味

Oisix菜籃仲有兩大條長蔥，我已經諗定點整，下個post見~

但有d傳統我都一定會照做，例如蒸糕、行花市、整homemade糖果小食

今年仲要包利是添~~~(未結婚既同事朋友對我好d喇~)

但今日唔係要講過年既野，但點解「年年都有」呢？

因為尋日收到Oisix的蔬茶盒，見到兩碌蓮藕，即時諗起要煮呢味野~

今日收早，一夠鐘我就去街市買排骨同柱侯醬

做法簡單非常，但平時我好少做，今次係第一次介紹呢款菜式

因為平時見到d蓮藕都好多泥，我好怕掂到佢，好似唔知點咁~

但Oisix呢隻蓮藕好乾淨，方便我呢類鐘意乾淨企理既人

食落係爽口既，唔似媽媽煲湯果隻又綿又藕斷絲連；我反而鐘意呢種口感，清新d

材料﹕Oisix有機蓮藕2條、排骨1磅

調味﹕柱侯醬1.5湯匙、水半杯、魚露1茶匙、生抽2湯匙、紹興酒1湯匙、生粉水(生粉1茶匙+2茶匙水)、薑2片

做法﹕

(1) 排骨飛水盛起備用，蓮藕刮皮切薄片

(2) 用份量外1湯匙油起鑊爆香薑片，下排骨爆炒片刻，將調味料(生粉水除外)拌勻後下鑊同煮至大滾，收至中細火煮至收汁，加入生粉水埋芡即可。

小撇步﹕

(1) 如時間不足以炆排骨至軟身，可改用肉片

(2) 調味內建議不下鹽，因柱侯醬味濃，煮至埋芡之前可先試味，再自行加減份量外之鹽份。

(3) 生粉水先拌勻，逐少加入鑊中避免一次倒進鑊中，應慢慢調較至合適的濃杰度。

睇左醫生，休息兩天才可以番工

有時在家比番工更加忙，要陪小臻玩、亦要預備晚餐

但忙也是忙得很快樂的

今天早上忙著氹小臻番學(叻仔﹗終於唔喊喇﹗)

訓訓訓訓左一個上午，然後接小臻放學(其實幾好玩，見到小臻係班房走出黎呆呆地，一見到我就笑騎騎)

等小臻訓左我就可以休息......傍晚開始預備晚餐

本來出外吃的，臨時轉陣去我新居火鍋(據聞室外只有10度，凍到癲左)

看我的邊爐宴盛況(我無胃口，只係食左少少......)

先講呢個湯底，Encore左第三次

堅好飲﹗我今次用西施骨、大量蕃茄、蘿蔔及三點蟹去熬煮而成

鮮味到不得了~正!!!

唔少得調味拼盤

買到日本廣島生蠔，好甜好肥美

灼完都唔會縮太多，值得再買(大昌，$62.9一盒)

我幫佢解凍時有一陣好香好鮮既生蠔味，唔腥~

有傻芬上次幫我買既靚肥牛，好味~

當然要有必食既丸霸(咁多丸，我覺得可以稱霸囉~)

我買到芝士丸，咬開可以拉出芝士絲架~勁好味﹗

我地係食菜之人，點可以無油麥菜同塞米呢??

天氣凍影響左d菜既生長速度，加上個個打邊爐好多菜都貴左

所以食下菇都唔錯，唔駛野野剩係食菜既~

最後仲有芋絲同豆腐

其實仲有三點蟹同埋蝦，可惜影唔到佢地~

之但係咁既場面都好夠照啦~係咪？

由於約左大家6pm上黎新居，而邊爐係7pm開始

所以之前整左d snack等大家食住傾

睇唔出係鴨舌？係我唔記得一開始就影，等大家食到尾聲先影；舌唔似舌......

傻芬小姐打包番屋企，食到停唔到口就知有幾好味~

秘制鴨舌唔係浪得虛名

呢d係豬仔骨，係事先醃左番黎，我只係負責焗，極之好味~

其實仲有茶葉蛋，但我無影到(又係好味之選，呢樣野我好有信心，皇牌)

黎喇，呢個係我好鐘意既邊爐調味架

有虎椒、辣椒、生蒜、蔥花

花甲，我下次會記得放鹽水再雪係雪櫃

海鮮四寶(帶子、桂花蚌、象拔蚌、墨魚仔)

唐生菜，其實仲有豆卜、腐竹、粟米、金菇但無影到~

金多寶(唔知比個咩名佢好，有好好味的芝士丸、蟹粉丸、芝士腸、魚片頭、龍蝦丸、貢丸、黑椒貢丸、八爪魚丸)

肉蟹兩大隻，斤幾啊呢度~(勁多膏呢)

我唔好呢味野，魚片~

又係魚片，最後食剩哂~

桶蠔，都係食剩哂~

蝦係胡先生幫手串成一串串，佢地好生猛我唔敢攪佢地~

喂，呢個係我煮既湯底

蕃茄花蟹煲，雖然有加到一粒濃湯寶，但味道的確係good~

咁既組合都咪話唔見得人，感激兄弟姊妹團的幫忙，呢餐大家係應得架﹗

人生有個真正朋友的確好極~飲勝﹗

同朋友打邊爐同食大閘蟹，十個滿足(我掛字食，無影相)

勞頓左一整日番到屋企已經散左，但星期日要去步行籌款(其實行得唔耐，但都好攰)

夜晚陳媽媽終於都番黎喇，為免佢又要煮飯咁辛苦，我決定又下廚

基於我都攰到嘔的情況下，今次出茅招~(嘿嘿﹗)

新居附近有好味醃物店，買左呢個燒汁豬仔骨，好好好好味﹗

我只係負責焗到佢金金黃黃，兄弟姊妹聚會果日都可以考慮買黎招呼客人~

呢個唔係茅招，係誠意作品黎架~

我洗菜都洗左三次，油麥菜好dirty啊，有蟲蟲

(定係檔菜檔衰呢？下次試另一檔唔鬼幫襯佢~)

我用鮑汁+薑汁+味醂+料理油+鹽做汁料炒菜，食之前先將d汁埋芡淋面，熱辣辣﹗

呢個係外賣，半邊鹽焗雞先$20

好味喎，媽媽都接受到，下次再試下另一檔~~

係攰到爆燈的情況下，能夠同媽媽、胡先生開飯原來也可以很快樂(飯後我meet左兩個橙過兩位大人物食，都咪話我唔乖~~呵呵~)

一家大細即係幾多人呢？有6大1小

我一個人如何處理這6大1小的晚餐呢？原來係得架~

焗一個豬頸肉，事前醃好、預熱焗爐180度焗20分鐘；搓上一層蜜糖再烤個10分鐘至邊邊有d焦就可以架喇~

這個欖菜炒白豆

呢個係膽，有佢係度成餐飯放心哂~

天氣咁熱，我竟然夠膽整呢味野~

不過今日買既炸豆腐好新鮮，由於有陳媽媽同蔡小臻唔食得辣，所以有少少失色

仲有一味冬瓜粒海鮮湯，好味啊而且又唔難整，會encore~

整一餐咁多人既飯真係要放假先做到

下星期六就係中秋節，聽日可能又再開工整冰皮喇~

我都會叫陳媽媽唔好煮，晚飯由我準備

一來陳媽媽要帶住臻臻已經好攰、二來煮晚飯對我黎講好有挑戰性

試想下由構思果晚要食d咩、到落實去買送、再番屋企準備，最重要係預時間煮同考慮埋保溫既問題；真係少d心機都唔得~

當你試過自己一手一腳去預備晚餐(包括飯後洗碗抹碗切生果的工序)

你就會更加發現世上的父母都係超人(唔一定係媽媽煮，好多爸爸都會煮飯架~)

請向所有父母致敬~

今日半日閒就預備多dd送，來個五小碟好了(個名好勁咁款，其實都係五碟普通野)

先來一碟蟹柳C粉皮

本來應該用雞絲，可惜吧，我冰箱只係得番蟹柳適合

其實蟹柳+青瓜絲，配上粉皮；最緊要係咩你知嘛？of cos係個醬汁啦~

日式芝麻醬是也﹗

跟住就係胡先生同陳媽媽都好鐘意食既(其實老大都好鐘意)「韮菜豬紅」

我都係去到街市見到幾四正先買黎整，一斤豬紅+$2韮菜

原來都唔難整，而且好入味~

當然唔少得我地既至愛．蕃茄

加隻蛋呃唔該，成為蕃茄炒蛋(老左少少，但依然好味)

亂咁醃既蜜味雞翼，焗佢20分鐘、食得﹗

仲有一碟呢？去左邊？

都只不過係一碟唔起眼既炒通菜，唔post相了~

但我發現要炒得靚仔，油一定唔少得﹗

其實仲有飯後果．小西瓜(真係好細小既西瓜)

但係大家都飽到震，最後都無食到

可以靜靜地同屋企人食餐飯，原來可以咁快樂~

胡先生一直播著足球賽事，攪到我時間都無睇到~

結果菜都無一條，好在冰箱仲有雜豆~

冰箱除左雜豆同雪糕之外，仲有海鮮恩物﹕大蝦、熱狗腸及大粒帶子

加埋惹味醬汁，就成為是日晚餐

隻蝦係有少少煎燶左

但原來咁仲好味(當然唔可以舊炭咁啦~)

帶子最好就係外表煎香左、內裡仲有些少生，咁就會最juicy

條熱狗腸係靈魂所在，裡面係好味到震既芝士(我用焗爐整熱，好味到呢~)

久唔久食下意粉，真開心﹗

喜歡預時設定兩小時內要完成的菜式，以致整整兩小時的流程

今次無睇食譜、在心中，由買送到煮飯，用了1.5hrs煮三送一湯

味道ok啊

呢個本來係想做雞絲粉皮，最後都係整左個青瓜炒+大量芝麻+雞扒

除左基本醃料之外，我加左味醂、料理酒及日式麻油，味道ok~

食之前加番d已烘炒過的芝麻就為之very good喇﹗

白灼蝦唔駛講，整熟就得、得左~

好甜又平，休魚期過後果然係食海鮮的好時機~

知喇、膽固醇高嘛......少食多滋味囉~(3個人食半斤仲要做埋便當翌日帶飯，好抵)

我覺得好難整d湯影得好睇

呢個湯好好味、瘦肉好香(我用薑醃過)、節瓜都林哂lu~

做左個便當比胡先生帶飯

個賣相唔差喎，我覺得......

我老早就想煲呢款湯，滋潤又易煲~

只要家中備有無花果、海底椰(呢兩樣野都雪得架、keep好耐架可以)

豬掙就要煲果日先買就最good，雪梨係我行過街市見到平先買，唔加都無問題既~

材料﹕豬掙肉$15(我係taste買d pack左見樣唔衰無瘀黑就買)、雪梨兩個、無花果3粒、海底椰2大個、水大半煲

做法﹕

(1) 豬掙切開一舊舊(想快d煲林就切細舊dd)、雪梨洗淨連皮一開四、無花果浸至軟身

(2) 份量外的水約半煲煮滾，加入豬掙肉汆水去血污，盛起沖淨

(3) 將份量內的大半煲水煮滾，將豬掙肉加入再煮至大滾時加入其他材料，當水再大滾之後轉中火一直煲1.5小時，加鹽調味就可以。

小撇步﹕

(1) 我係taste買美國的無花果，鐘意佢大大粒、味清甜而且價錢唔算太貴；聽聞係藥材店買到的白色無花果係有硫黃，雖然我買幾次都無怪味。

(2) 雪梨一開四，但唔好切入個心度，會酸架~

估唔到都得到好多新朋友舊朋友的正面回響

早兩晚整的中式晚餐有朋友問做法，講到食譜呢家野唔係呢度post好似唔多合理咁

所以今次就介紹一致備受好評的黑豚肉金菇卷

做法簡單到不能，問題係你買唔買到平、靚、正的黑豚肉片咁解啦~

材料﹕黑豚肉片1盒、金菇1包

汁料﹕烤鰻魚汁2湯匙、鹽1茶匙、生粉水適量

做法﹕

(1) 金菇洗淨、黑豚肉片兩面均勻灑上黑椒粒；一片黑豚肉卷一束金菇，直至所有材料用完

(2) 燒熱1湯匙油，將黑豚肉金菇卷稍為煎香；盛起備用

(3) 將汁料煮滾後將黑豚肉金菇卷回鑊，當汁料煮至大滾就慢慢加入生粉水煮至適合的濃度，即可上碟。

小撇步﹕

(1) 我用即磨黑椒，香味更突出

(2) 黑豚肉片我在凍肉店買到，我估jusco/city super都會有

(3) 我發現黑豚肉金菇卷有d血水(始終係生肉，而且洗過，有d血水係難免既)；我會用廚房紙索一索再煎，盡量乾身d煎會更香口。

(4) 如果喜歡麻油香味的話，可以係鑊中最後加少許麻油，上碟時灑上白芝麻

(5) 金菇要切左個有泥的尾，沖洗一下再撕成一束束

(6) 我覺得用肥牛或者煙肉卷d蔬菜都係好好的配搭，不妨一試

碰巧今日收早，就買送預備以下的中式晚餐

唔係講笑，我真係有計劃過點樣煮、煮邊樣先、幾時煮飯......

時間有限，希望大家食既時候送菜仍然係熱既

白灼蝦，平靚正

無花果海底椰雪梨煲豬掙

呢碟係外賣

照燒黑豚肉金菇卷

其實仲有豆豉蒜泥炆排骨，不過我手太震、唔出得街，所以唔post呢款喇~

味道係ok既，賣相要再努力d

時間有限，番到屋企已經6點，買送連煮最後可以8點幾開飯，個人認為已經算係咁

下次希望再進步d啦~(所有送都清哂，無隔夜送~)

左想右想最後決定整咖哩雞扒意粉

呢個組合係咪好奇怪呢？咖哩雞扒？意粉？

怪就由得佢怪囉，好味先係最緊要嘛~

好開心，終於都買到方型白碟

同老三食飯咩都可以無，菜一定要有(其實白飯都好緊要)

無薑的情況下，我用左料理酒、糖同鹽炒芥蘭，如果加埋薑汁就一定更好味

整左黎食.........

只係需要用水灼熟，加你自己喜愛的汁料就可以

我已經加左黑松露

但我夠膽講句，真係唔好食啊啊啊~

仲要咁貴，真係撞鬼

下次去食東東雲吞吧啦~