仲等我整左送禮自用都咁good的薑糖添……

呢班夠薑之人話今次薑味無上次咁濃，但口感就非常煙un

哼，既然你地夠薑，咪怪我下次重手﹗嘿嘿……

Bonnie，我下次整d夠薑薑糖比你下~

原本只是自創一些食譜，斗膽放上網絡分享，最後竟然意外地得到大家的支持

除了感激，還是感激。

早在六、七年前我已於某個地方文字發功，從沒有打算跟誰人分享本來就很私人的一面；偶爾遇上投緣的朋友才會交流一二，今晚收到友人的留言有點感觸

朋友說很喜歡我的文字，更喜歡我的料理

我很久沒有更新文字部落格，最近就連料理這邊的步伐也放慢了；以為沒有人注意，原來支持的朋友一直都在。

久不久碰面的朋友，我也很喜歡為你預備小點心；希望很快又可以見面吧，請努力做每星期兩次的瑜伽﹗

少時候身邊沒有什麼真心朋友，老師曾說過好朋友就是讀書時期才會遇到，人越大越複雜，要坦誠交往就越見艱難；那是因為我幸運、也是天父的安排，長大了才遇上真心交往的朋友，雖然不常與大家聯繫，但一切盡在不言中。

知道身邊的朋友最近發生了點事，很希望大家都可以和諧唔再食蟹(朋友會明我講咩架喇)

送上加重了薑味的薑糖

黎黎黎，食粒糖、開心番啦~

本來已放棄Homemade豆花的念頭，但近來在二仔買到一包豆花粉，上面註明只需用上100ml凍水開勻、以500ml熱水沖開，再加熱煮沸後注入大碗待凝固，即可。

只要買滿$50就可以$10優惠價買一包豆花粉，做法的確唔難，而且好香豆味、口感尚算滑順，只是顏色未算雪白(偏黃)；成功率幾高，大家唔食雪糕的話不妨試下呢個~

小撇步﹕待凝固的過程大約要整碗豆花放涼後一小時，過程中會在面層結出一塊腐皮，好味的~

藍白色蠟紙的包裝、食用米紙包裹著煙un軟綿的薑糖，最愛那帶薑辣的味道，食完滿咀的薑糖粉；小小一包用塑膠袋裝著，記得是$3@ 包，現在仍有市售。

早幾日一位留言的blogger問起黑糖合桃糕的質感是否如新亞薑糖；這樣一提，其實又有幾分相似；也就引起我自製薑糖的興緻。

做了幾日、薑糖也被消滅，卻一直未有機會出post，今天就讓它面世吧!

製作後感﹕唔難整、而且材料是家中齊備，重點是只需要微波爐叮就做好；會encore

陳媽媽食後感﹕好味。

老三食後感﹕多d薑味，更好﹗

一起來回味這個童年回憶吧

材料﹕糯米粉120g、黃糖80g、薑汁2-3湯匙、水120ml、麥芽糖20g、熟糕粉適量

做法﹕

(1) 除熟糕粉外所有材料混合，直至麥芽糖化開；蓋上微波爐用保鮮紙，微波爐加熱2分鐘；拿出來充份拌勻再加熱1分半鐘；拿出來充份拌勻後最後加熱30秒。

(3) 將薑糖置於已撒滿熟糕粉的盤子裡，盡量攤平成四方型；待完全放涼後，切成你喜愛的大小，掃去多餘的糕粉即成為美味的薑糖。

小撇步﹕

(1) 用木匙較易將薑糖推落熟糕盤上及將糖攤成四方型

(2) 薑汁可自行加減，我覺得2湯匙唔夠辣味，加夠3湯匙0岩味d~

製作的過程中我是抱著實驗的心態，第一次不知道會效果如何

最後，又一次實驗成功﹗

同樣是外表平實、沉著的糕點

一個一個包好，作為給朋友的伴手禮

黑糖與核桃，原來是很好的搭配

看著這一座小山丘，原來晚上做糕點也不是不可能的事呢

而且時間才不過半個小時，就做出十塊八塊的黑糖核桃糕，很化算嘛......

材料﹕糯米粉100g、黑糖80g、核桃90g、水120ml、麥芽糖15g、鹽少許、熟糕粉適量

做法﹕

(1) 核桃預先烘烤或白鑊炒過，切碎備用。

(2) 其餘所有材料混合，直至麥芽糖化開；蓋上微波爐用保鮮紙，微波爐加熱2分鐘；拿出來充份拌勻再加熱1分半鐘；拿出來充份拌勻後加入核桃碎拌勻，加熱最後30秒。

(3) 將黑糖核桃糕置於已撒滿熟糕粉的盤子裡，盡量攤平成四方型；待完全放涼後，切成你喜愛的大小，掃去多餘的糕粉即成為郭靖一樣的黑糖核桃糕。

小撇步﹕我用木匙，比較易處理；但留意，個糕本身係好黏，最後將個糕易入熟糕粉的盤子時，可事先掂d糕粉先。

點解係同郭靖一樣呢？我覺得郭靖就係沉著、看似不起眼的人物，但其實佢有佢特別的地方，試過你就知~

你或許未知道，兩者之間加入黃糖這個第三者，原來味道會是如此令人難以忘記

如果你並不同意這一點，沒有關係

因為口味總是個人而獨特、不需要別人的認同

材料﹕低根麵粉60g、上新粉30g、抹茶粉2g(沒有入鏡)、日本原粒紅豆200g、黃糖50g、蛋白4個(沒有入鏡)

小撇步﹕低粉+上新粉+抹茶粉需先前過篩兩次，確保粉粒變得幼細

我的紅豆是買現成已煮好的日本紅豆罐頭，在Jusco十蚊店有售(約$12)

先將蛋白打至起泡

小撇步﹕蛋白打得起，所有接觸蛋白的東西都一定要乾及不沾其他雜質，包括﹕蛋黃

打到蛋白起泡後，分兩至三次加入黃糖

繼續以中速打發

打到大家見到這幅圖的狀態即可收手

將紅豆加入蛋白糖糊內，以「孤寒刮」切拌

切拌至大家見到這幅圖的情況就可以了

此時可加入預先過篩的粉類

繼續以「孤寒刮」切拌至不見粉粒

直至大家見到的這個情況，基本上蛋糕糊已完成

可將蛋糕糊注入你喜愛的微波爐模具，加熱1-2分鐘，取出以牙籤插入，再拔出時不沾漿的話即完成。

想要做點裝飾嗎？可利用防潮糖霜

先前將模紙放在蛋糕面，灑上防潮糖霜後再拉開模紙，即可。

看﹗今次我做星星系列，我超喜愛第一個三粒星星的擺法

由於喜愛，所以佢成日做大頭仔排No.1比我影~

還有這一個，陳媽媽說size很像香蕉糕

總括而言，我頗滿意這一次的蛋糕

不用開火、速度快、成品美味(仲可以幫我清存貨呢)

雖然微波爐叮的食物都是少吃為妙......久不久來一次吧~

今次附上製作過程的相片，以便大家更明瞭當中的步驟

材料﹕糖漬桂花4茶匙、蒟蒻粉30g、水680ml(水沒有出鏡)

材料﹕荔枝(去皮去核撕碎)半磅、蜜糖30g、檸檬汁1湯匙

相中是已混和這三種材料的混合物

將蒟蒻水加熱至微滾即可熄火

將糖漬桂花加入蒟蒻水

混和後成桂花蒟蒻(如不加入荔枝的話，可在此時加入蜜糖及檸檬汁，注入模具或容器，冷凍後即成為桂花蒟蒻)

晶瑩剔透的消暑良品「荔枝桂花蒟蒻」向大家招手~(食我啦食我啦~)

我覺得好似幅畫......

小撇步﹕蒟蒻水加熱後很快會凝固，所以加入其他材料的速度要快，不放入雪櫃其實成品也會凝固，但冷凍後風味更好~

年多前我醃製了一次，真的很方便

無論是想做桂花馬蹄露，還是荔枝桂花糕，只要從雪櫃取出自家製的糖漬桂花，掏出一兩茶匙就可以為身邊人做出具備風味的別緻甜點。

困難嗎？一點也不，只需要按步驟就可以輕鬆製作了~

預備材料﹕半片片糖、乾桂花2g、半個飯碗水或2/3杯水

只需要將所有材料一同加熱直至糖融

講究一點，可以先將水及糖加熱至糖融，之後再加入乾桂花續煮1-2分鐘即可熄火

糖桂花會越煮越深色

煮好就可以注入容器內，待涼後放雪櫃冷藏(容器需事先消毒)

就是這麼簡單，便可做出自家製糖漬桂花了。

小撇步﹕

(1) 糖漬桂花會隨時間越久、顏色變深、桂花香氣更濃。

(2) 市面有出售糖桂花，而且會發現桂花量很澎湃，我個人認為自家製吃得比較放心，想要澎湃的桂花嗎？多加2g乾桂花不就行了嗎~~~

我既荔枝桂花蒟蒻又黎喇~

你就知道佢幾咁好食，幾咁易整~

做法唔講喇，大家去之前幾篇搵到架喇~

同場加映，十蚊店買到既梅子凍

好削啊，不過味道唔錯，可以試下自己整

係放食材的櫃入面搵搵搵，終於比我搵到包蒟蒻粉

又突然記起朋友珍講過我好耐之前整既蜜糖桂花糕比用冰糖整既滋潤好多

需知道蜜糖加熱會變酸，但一般既桂花糕用大菜做成一定要加熱煮過先得

經過一輪的實驗之後，終於比我研究到蜜糖桂花糕的做法

而且今次加入荔枝(上兩次加左都覺得好match)

校長都話好清新好夏天既口感啊(係啊，我又講口感啊~)

哈哈﹗好大堆頭呢~

我好鐘意d糖桂花咁樣散開，好靚啊~

講開糖桂花，我之前醃既果d已經用完了，終於可以再整喇﹗

糖漬桂花的做法﹕自家製－糖漬桂花

荔枝桂花蒟蒻食譜﹕

材料﹕荔枝一磅、飲用水680ml、蒟蒻粉30克、蜜糖60克、糖漬桂花4茶匙

做法﹕

(1) 荔枝去皮去核撕碎

(2) 蒟蒻粉+水煮熱熄火，加入其他材料攪勻，最後加入荔枝即可注入模具放涼雪凍

小撇步﹕

荔枝會一路撕一路出汁，d汁好香好甜唔好倒，所以我將煮蒟蒻的水減左份量，唔係會好削。

再黎，利賓立仔仔由一杯杯變成一粒粒

做法同上，只係需要抽起荔枝及蜜糖部份

材料﹕利賓立350ml、水350ml、蒟蒻粉30克

做法﹕所有材料攪勻煮熱，注入模具冷凍至凝固。

天氣咁熱，整呢d食下，成個人都涼快哂~~~

係呢個moment要PG家長指引，因為我要爆喇~

頭好痛，睇黎作病......(你地唔好同老細講同我有緊密接觸搏隔離7日啊下)

無論我有幾唔舒服，我對料理既火熱係唔會熄架(我熱到痴左孖筋﹗)

唔好問我點樣抽時間去整

唔好問我點解樣樣唔整要整呢樣野

唔好再問我點解...因為...我都好想知點解....

點解天氣咁熱、點解室內溫度保持係25.5度先叫正常溫度、點解我個頭咁痛都唔去訓死係呢度出post、點解我個mario賽車mission打極都唔爆game、點解我個yahoo blog瀏覽人次兩日都係「零」但不停收到留言......

點解？我都唔知點解~~呵呵(我真係熱到痴左)

你咪理、我愛你，死未？﹗黎，涼一涼佢先~~

比兩舊冰你地食

唔似咩？點解啊？

好好味架喎，想唔想整黎食下先？

材料﹕蒟蒻粉15克、水1.5杯(約350ml)、蜜糖30克、桂花糖2茶匙、罐裝荔枝1罐

做法﹕蒟蒻粉+水開勻並加熱至微滾，熄火後將其餘材料加入攪勻，冷至凝固即可。

小撇步﹕

(1) 先將蒟蒻粉用水開勻，仲有小小粉粒都唔怕，加熱佢就會係你面前消失﹗再唔消失既，你可以一隻手指捽死佢~~(我又發癲喇喇喇......)

(2) 加熱既時候盡量用細火，慢慢加熱就可以，間中攪下佢，多數唔會痴底。

(3) 蒟蒻凝固得好快，即使室溫都會凝固，所以如果想撇走表面d泡泡啊、整下d桂花同荔枝既樣就要快手d~~

(4) 今次原粒放荔枝，都ok；但想個樣靚仔d，將d荔枝撕碎或者切粒啦~

好喇，我爆完......要去訓覺﹗

我鐘意黑糖、黃糖、三溫糖......

但係媽媽鐘意食白糖糕呢d中式糕點，今日發現三聯書局做「電視框」

入左幾本想買好好好耐既食譜書，其中一本係新書黎架~(大少奶果本未買到)

其中一本教整傳統糕點包餅，白糖糕係其中一樣(做法好簡單啊，唔整就怪lu)

個樣好似方包啊，媽媽話好好食

無酸味，而且又鬆又軟

大家都想試下整嗎？

材料﹕酵母.0.5克、泡打粉5克、糖60克、水175克、粘米粉100克

做法﹕

(1) 將所有材料攪勻過篩及注入蒸盤，靜置2-3個鐘

(2) 將蒸盤凍水落鑊大火蒸5分鐘(已經水熟的時候開始)，轉細火蒸5分鐘，最後大火再蒸5分鐘就得喇

小撇步﹕

(1)佢中間會出現你地見到上圖我用黑圈圈住既泡泡，正常現象唔駛驚(雖然好樣衰下)

(2)要放一陣先好切，一刀過唔好一路切一路拖把刀，會整爛個糕架~

祝大家步步糕昇(過年咁款~)

聽說當地的阿嬤用芋頭跟地瓜粉弄出可口的圓子，口感QQ的

有冰的、也有熱的

我比較愛吃冰的口味，要知道芋圓煮得熱騰騰再放進冰糖水裡面去，雙重享受哦

一轉眼，從台灣回來也快要一年

記得回來不久，就去看五月天的Live Show；超high的說﹗

五月天今年的演唱會聽說擬在5月20日或21日進行，真的很想去看

五迷要注意售票期限

現在想要買票還早，來吃個港式芋圓怎樣？

在二德惠有售，回來不用解凍，燒開糖水直接把圓子放進去煮到熟就可以了

每次聽到五月天的歌、看到他們的惡攪，我心情就會好過來......

今年年初又係咁凍，encore一次啦~

其實我唔係十分喜歡燉蛋，因為太漏，食得多好滯添啊~

之但係自己整就可以較個甜度

Any肥~小食多知味，多食壞肚皮啦~

材料﹕水一杯、冰糖60克、蛋3隻、薑汁2湯匙

做法﹕水+糖煮至糖融後放涼，加入薑汁攪拌，加入已打發的蛋液之中，過篩注入碗中隔熱水蒸20分鐘至熟，就ok喇~

小撇步﹕

(1) 蒸先以鍚紙包好，可免倒汗水弄花蛋面

(2) 過篩後燉蛋才會滑

(3) 蛋面的小泡泡必需抹去，以免影響口感及賣相

(4) 薑用老薑的好，夠粉，薑汁放了一會就有一陣白色粉末，要先攪一攪再加入糖水中。其實呢d白色既粉末係好有用架，令到薑汁撞奶會凝固都係多得佢~

每逢過年前我都有鋪食糕癮

什麼年糕、蘿蔔糕、芋頭糕、馬蹄糕、黃金糕都係我的最愛

已經買了兩張稻香年糕券(年年都買，今年都唔例外啦~)

不過未有得拎住，就自己蒸一底食住先囉

咁多種糕，年糕係最易整既一種~

攪好個漿就可以蒸，爐火甘d，要蒸成粒鐘

但出爐果下見到個底糕真係好有滿足感

今次唔記得要比油，所以黏得好厲害

不過味道就好好食，媽媽話傳統的年糕唔會加澄麵，不過加左就煙un d

大家會唔會自己蒸糕架？

材料﹕糯米粉300克、澄麵粉75克、片糖300克、水490克、薑汁2湯匙

做法﹕

(1) 片糖+水煮成糖水放涼，加入薑汁

(2) 糯米粉+澄麵粉，過篩；將(1)加入用筷子攪勻

(3) 將(2)過篩兩次，用少許油掃一掃鍚紙兜，注入粉漿；隔水蒸1小時就OK喇~