香港新浪網 MySinaBlog
yen | 28th Feb 2009 | 文字.碎碎唸 | (72 Reads)

各位,我有野想同大家講

 

 

 

我決定停blog兩天

最近實在有太多的煩瑣事令到我心緒不寧

我好想靜一靜,再諗下自己要點樣做

放心,唔係咩大件事

加上星期日好友有一項大任務,唔想帶住壞心情去過

 

尋晚,我同幾位好朋友為星期日呢個好友做左一件壯舉

詳情就留待星期一公佈啦

好勁好感動既一件事,密切留意﹗


yen | 27th Feb 2009 | 簡易晚餐 | (375 Reads)

大家出街食日本野或者韓國野,多數都會食到前菜

有一味涼菜「海帶/昆布」係賣飛佛黎架......

某日放工同胡先生去行Jusco,見到有一包包的乾燥昆布賣,膽粗粗買黎試下

但係放係個工具箱入面好耐都無整,今晚心血來潮整一包黎試下

按包裝上的做法,只要浸開就食得架喇

老三幫我用食水浸果d昆布乾,約5分鐘後就瀝水放上碟,加埋佢附送的味汁

就攪掂喇﹗誕誕~~

浸開都好大堆頭,味道有少少似海蜇,汁料酸甜,幾好味~

加上有少量的紅昆布,感覺好fresh~

推介比大家,十蚊包,夠2-3人份量


yen | 26th Feb 2009 | 簡易晚餐 | (272 Reads)

點解出街食飯叫丁麵會加3蚊,而叫公仔麵只係需要加2蚊呢?

其實真係有d歧視,胡先生都係鐘意食丁麵而唔鐘意食公仔麵

我睇丁麵係有佢既魔力

某個週日,全家都出哂街,得番一個要番*肚臍更既我

想煮d野食完先番工,一打開個廚櫃

"嘩"..........................................................成個櫃都係丁麵?!?!

又話丁麵貴既,邊個買咁多番黎????

再望下灶頭旁邊有一碗陳媽媽留比我既咖哩豬皮魚蛋

無理由唔煮個麵拌住食架~係咪先呃?

最後就演變成.........................................................................

陳記車仔麵

三送一麵,送熱茶或熱水一杯,轉丁麵加$3;成惠$27

*肚臍更=番1pm放5pm的shift(正常係番9am放5pm)


yen | 25th Feb 2009 | 包點、曲奇 | (262 Reads)

星期日同媽媽去完街,就番屋企整野食~

諗起大少奶的芝麻脆餅方法簡單、材料我又有齊,所以就起壇整餅喇

無錯,呢個係偷食後的芝麻餅

你知道嘛,我第一次覺得自己整餅有一手

因為我覺得個餅無難度而且好好好好好好味啊啊啊啊~~~~~~~~~~~~~~~~~~~~

加杯茶就真係無得頂喇......

好喇,pack入樽留番比媽媽食;抽起三塊比我的最愛先......

食譜參考自大少奶

材料﹕低粉200克、黑糖90克、梳打粉1/4茶匙、泡打粉1/2茶匙、蛋1隻、水20克、油40克、白芝麻 / 黑芝麻適量

做法﹕

(1) 粉類過篩,加入砂糖 + 雞蛋 + 油 + 水 ( 混 合 ) 用手輕輕攪拌搓勻 。

(4) 將麵團搓成小圓波,滾在黑白芝麻,再用手輕輕壓扁麵團;以170度焗10-15分鐘

 

我將份量裡面的糖改為黑糖,鐘意佢獨特的香味;我推介黑糖,大家試下呃~又或者用黃糖呃;白糖其實加工過,無咁天然......


yen | 24th Feb 2009 | 陳媽媽料理 | (284 Reads)

心情很壞的一個晚上,回到家想跟可愛的小臻臻耍樂一番

可惜臻臻已回家去了,老三在廚房嚷著「有好野食~」

我打開飯煲(無錯,係飯煲)看到陳媽媽煮的糖水

似豆漿、白果已煮得好稔......好有媽媽的味道

有媽媽真好﹗


yen | 23rd Feb 2009 | 陳媽媽料理 | (178 Reads)

上週日陳媽媽做了一道菜,令我同老三都讚不絕口

媽媽話係報紙見到有一間酒家,將呢道菜賣四十幾蚊

週日早上去買菜的時候,遇上$10/2包的蘆筍BB,又想起這道菜

心血來潮就整左出黎

雖然我地未食過酒家這道菜的味道,但單看賣相已經覺得陳媽媽好厲害

加上味道鹹香爽脆,我覺得好捧好捧呢......

陳媽媽光看了報紙的介紹就已經做得出色,好厲害呢~(比d掌聲佢﹗)


yen | 23rd Feb 2009 | 文字.碎碎唸 | (64 Reads)

本週某日心情欠佳,突然好想為自己點一道可人的甜點

走著走著,來到了杳無人煙的麻布茶房

翻開餐牌碰上了他,好一個一見鐘情

著侍應為我送上這一個就連名字都忘記了的甜點

外型很令人感動是嗎?與餐牌的圖示相比,實物似乎遜色多了......

幸好,還有最夠看頭的雲呢拿軟雪糕

溫溫柔柔的與已累得發麻的味蕾打個照面,在舌頭上慢慢擴散、退到咽喉裡去......

可恨的是抹茶口味,苦澀充斥在眉宇之間

最後,吃著那又紅又綠的小可愛,心情變我開朗起來

再大踏步往前面的路繼續走......

朋友,如果你心情鬱悶;起一個美麗的甜點,心情會好起來呢~


yen | 22nd Feb 2009 | 西式甜點 | (500 Reads)

好過份﹗真係好過份﹗咁都做得出?

做咩姐~(苦榮聲音演繹)

我只係將洛神花茶凍切到好似凍餅咁樣扮下野姐~有咩咁過份?

我無聊呃嘛、我想佢靚d呃嘛、我有mints未用哂、我我我我我.......................

佢半透明半紅的色澤、踏實的質地;我敢講,如果有大量親友到訪的時候(我有廚房用的話),我會整呢個野黎招呼大家......

有甜品又點少得主菜呢?今日我收工時去左jusco入貨,走既時候途經佢地的小賣店,被欺騙了,買了兩樣好難食的東東;大家唔好上當啊~

如果我唔係上左當,我今日就唔會同大家講呢番說話

朋友﹗雖然忠言逆耳,聽我講唔好再尋你既夢(有無人知呢句係出自邊齣戲的對白呢?比d tips你地,係劉德華同關芝林主演既......)

呢條叫日式燒鯖魚(老三話係臭魚)

腥到呢........................

呢兩隻燒脾係小賣店sell既時候好香,但番到黎就變哂樣了~

佢一定係用左妖法黎欺騙我....真係可惡﹗


yen | 21st Feb 2009 | 文字.碎碎唸 | (96 Reads)

早晨,週六的早上

你仍在被窩與大被纏綿嗎?

還是已在辦公室的案頭前努力著?

無論如何,你總有時候會上上網(都市人嘛)、偶爾來這裡坐坐

就在這個時間,我為你介紹一個值得瀏覽的好地方

(相片節錄自「寄情」電子版) 

秋良,2005年尾瀏覽網頁時認識的一位男生

他,一位多愁善感、古靈精怪、有時會為際遇抱不平、有時會逆來順受無可奈何

熟悉嗎?我們有時不也是這樣呢

2006年12月,秋良生了一個女兒,名為﹕寄情(注﹕秋良是男生)

寄情是很有趣、像相很不賴的作品(呃,對了,寄情是一個作品而不是人)

有趣有趣,你有時間嗎?

來這裡坐坐吧﹕ http://iamautumn.hostrator.com/album/book/20061200/index.html


yen | 21st Feb 2009 | 包點、曲奇 | (802 Reads)

最近有很多不如意事,心情有一段時間低沉得不能言喻

如果世界上真的有叮噹,我好希望向他借來一度隨意門、再來一隻竹蜻蜓

閉上雙眼手一推,就可以回到那個我會微笑的地方、跟那些人回味那份最真的感動

竹蜻蜓往頭頂一放,就像候鳥一樣往心裡頭最暖的地方頭也不回的飛去

世上有叮噹嗎?有隨意門嗎?有竹蜻蜓嗎?還是都已經躲起來了?

讓我來弄幾個豆沙餅,引誘饞嘴的機械貓吧.......

看來叮噹還是不肯露面

花了心思做了一堆豆沙餅,誰來吃啊?

好吧,通通都包起來,明天帶回戰地給戰友們送暖

用傻芬給我的小禮盒,Hello mimi帶叮噹的豆沙餅......

吃過我的豆沙餅,躲在人們心坎處的叮噹就要帶著隨意門竹蜻蜓出來

希望我們都可以快樂起來......


Next