香港新浪網 MySinaBlog
yen | 31st Jan 2009 | 文字.碎碎唸 | (142 Reads)

唔知你信唔信、明唔明、有無同感

人生總有些朋友係無論幾耐無見、幾耐無講電話

只要一句話,真係會上心而且幫得幾多就幾多

如果呢種朋友你十隻手指數唔哂,我相信你都好忙下

我唔係一個喜歡聯誼、喜歡維持關係、打電話同朋友傾計既人

以上的這一類朋友,我更加係買少見少

如果我有困難、難過、快樂、有需要時,曾經搵過你,你就是我的朋友了

以下呢一堆伴手禮絕對唔係我呢個朋友黎同我拜年或者出街食飯時整比佢

而係我整完拎出去,同佢係地鐵站交收(當然我之後係去接胡先生放工啦)

呢個朋友,好懶﹗勁少睇我呢個blog,所以無預佢會見到呢個post(佢自己blog都好少update)

不過我真係好想比大家睇下,我覺得真係威喎﹗(一次過整三款)

少少失敗的焦糖果仁(我個朋友只係留意到個樽好靚,真係想打爆佢個頭)

桂花糕,點解深色成咁?因為我將大菜的份量預多左,想實正d(係比朋友的媽媽)

我呢個朋友胃唔係幾好,唔飲得咖啡;整呢個咖啡曲奇幫佢止下癮~(我用金罐整,好鬆化;不過第一次整未掌握到定型的方法,下次焗之前要雪一雪先)

 

希望朋友鐘意啦~祝身體健康﹗


yen | 30th Jan 2009 | 節日食譜 | (351 Reads)

我相信每家每戶都有自己一種特別的味道

朋友講過炒芥蘭加薑汁、酒和糖的食味,是他父親專屬的味道

嗅到香燭的火舌味,就會想起叔公的家

雪花糕、玉蘭油的護膚香氣,是兒時陳媽媽給我的氣味回憶

味甘帶蔗香的古法年糕,就是兒時陳爸爸在鄉下帶回來的過年味道

大概已經有十幾年沒看過、吃過這種獨特的鄉下味

年初三的晚上,老三一進門口就好興奮的說,有好東西﹗

原來她從車干先生的家裡把爸爸的鄉下味帶了回來

看﹗就是這個東西﹗

是一種粉粉、有點硬,第一口不怎麼樣、慢慢咀嚼才吃得到甘甜和做這道料理的人那份心意跟賣力。

年糕嘛,要吃得糯又有咬口,撻漿的功夫省不了。

車干先生,請你代我們跟婆婆和你媽道謝了﹗

 

雖然味道是很像了,可沒有陳爸爸,這種味道只能當隨意門

帶我回到那年那月那個春節,在廚房......爸爸切一片年糕片給我,自己也跟著吃,還邊吃邊用鄉下話說「好吃好吃﹗」

 

老豆,你好嗎?充心感謝、珍重再見


yen | 29th Jan 2009 | 節日食譜 | (883 Reads)

各位﹗年初二既開年飯陳媽媽由朝忙到晚,之後由德高望重既表嫂99(我阿姨)協作下

出左年初二開年飯十二道菜﹗

無睇錯係十二道~

大蝦碌、豉油雞、發財好事、象胈蚝炒蜜豆、帶子西蘭花、鮑魚響螺湯、蒸斑、橫財好事(呢個影唔到)、鮑魚片燴生菜

象胈蚝炒蜜豆(後面既係大蝦碌)

豉油雞

帶子西蘭花x2

鮑魚片燴生菜

蒸斑

發財好事

 

sorry呢~我真係影唔得哂~因為好忙好忙啊~

不過成餐飯都好正﹗之後仲要成班表兄弟妹一齊玩UNO、玩啤牌食哂d黃金糕~

來年一定會更好玩架~~~


yen | 28th Jan 2009 | 節日食譜 | (669 Reads)

今日大年初三,祝大家全年都有氣有力、身壯力健、中氣十足﹗

恭喜、恭喜

話說放假之前我去左Jusco入貨,買左包豆腐煎餅粉,見個包裝既樣好似好好味咁,所以就買左一包番黎試下,點知就出事喇~

拿﹗我無執過d色架﹗原來已經係咁既款~係咪好似幾好味咁呢?

唔好比佢虛假的外表欺騙你地,實質上唔多好味架~

具體d黎講,佢既質地真係豆腐咁,只係加左果包粉之後就可以整成一個個咁去煎

最後就成為你地見到既咁~

重點黎喇,一咬落去果種糊pat pat的質地唔係人人都受~

而咁鐘意食煙un野既我,當然你即時從must buy item將佢kick away啦~

不過話哂我都好比心機去整,而且想提醒大家唔好去jusco買呢包豆腐煎餅粉,$10都係錢黎架嘛~要買就不如買佢地既冷麵,好好味~~~

等天氣無咁凍,我就整個冷麵食下~~

 

依,今日赤口,我要搵人鬧下交先得~~一陣再傾~~~


yen | 27th Jan 2009 | 節日食譜 | (367 Reads)

今日係大年初二,先祝大家心想事成、平平安安﹗

每逢年初二就係陳家的團拜日,阿姨表哥佢地都會黎哂我地屋企食開年飯﹗

舊年陳媽媽破例出去酒樓食,咁下午既時間就可以同阿姨佢地耍樂一番、輕鬆d

但由於陳媽媽傳統,希望都係一家人係屋企食,而且可以食得幾豪都唔會肉赤

所以今年媽媽都係屋企自己煮,我一陣先同大家報導今年開年飯的菜式啦﹗


yen | 27th Jan 2009 | 節日食譜 | (1069 Reads)

年廿九我去左胡先生屋企食飯,呢一日我做左生平第一次的「芋蝦」

我唔知芋蝦的由來,亦從來都無食過芋蝦

但今個新年多得胡媽媽的指導,成功製作第一趟的芋蝦

大家睇睇先~

一個個、細細粒、好鬆化、又香芋頭味

我同胡媽媽去炸既時候,試食左一舊,真係好味呢......好味過薯片﹗

由刨芋絲、較味、炸,都係胡媽媽從旁指導

雖然開始既時候我唔識個技巧整得有d怪怪地,後來胡媽媽教左d秘訣,最後幾粒都算係成功呢~~~~

yeah﹗真係好感動~~好開心啊~

 

今日呢一樽芋蝦已經食哂喇﹗

食過既屋企人都讚不絕口,希望不久的將來我會再整啦﹗

胡媽媽話齋,識左之後就鐘意幾時整都得~~~~


yen | 26th Jan 2009 | 文字.碎碎唸 | (45 Reads)

爆竹一聲,牛年就唔客氣地踩場喇﹗

你地做緊咩呢?

聽日有咩節目呢?

會唔會悶到爆呢?

新年好多時都聽到朋友講,好悶啊~

打麻雀、重播賀歲片、操啤、煎糕,好悶啊好悶啊~

雖然係咁,但我仍然熱愛新年~因為感覺上好有feel~

咩feel?唔知啊~仲之好似好高興咁啦~

我年廿八就收爐,大老細朝早比呢支野我睇

係jelly bean的糖,個樽好得﹗即時影番張相比你地睇下~

okok﹗我承認當時我係備緊課,但都忍唔住要偷藝術家個位既買張劉馬仔揮春黎shoot一shoot﹗

各位朋友﹗恭喜發財啊~


yen | 25th Jan 2009 | 文字.碎碎唸 | (131 Reads)

特別新聞報導﹗

維園年宵市場人頭湧湧

有一對唔怕逼到傻既情侶為左感受過年的氣氛,毅然衝入人群之中

係事發的時候,女朋友由男朋友護駕的情況下,影左以下幾張玉照

鮑魚......係鮑魚囉ok?點解要賣鮑魚呢?

不過又真係幾像真,可惜女朋友不感興趣呢~

拿﹗呢位不願出鏡人士就係sales哥哥,佢話呢粒金莎價值$68

而女朋友當然係采佢都傻,往前走......

yo~係全個場最多人買既雞蛋仔﹗

有無人知點解牛年要賣雞蛋仔?而全個維園最貴既一檔要賣到$88

最後男朋友買左一粒大金莎比女朋友,經一輪講價後,以$45成交﹗

男朋友話好抵,抵在一直沿途好多人投以羨慕同好想買番粒既目光,男朋友話﹕

粒金莎係其次,重點係$45買左1000噸虛榮感

哈哈﹗都咪話唔爽(女朋友奉勸各位一句,要有足夠手力全程高舉粒金莎走完成個年宵先好買;因為唔係檔檔有售,早買就有排拎架喇~~~)

好﹗報導完畢﹗


yen | 25th Jan 2009 | 節日食譜 | (527 Reads)

賣懶、賣懶、賣到年卅晚

賣冷、賣冷、賣到年卅晚

又係凍的新年,好似咁先有feel d

但可唔可以唔落雨呢?唔該......

當你睇到呢篇post的時候,我可能已經身處維園而不能自已,多希望聽日唔會逼到以後update唔到個blog(唔好比陳媽媽同胡先生睇到呢句,實提早同我開年^.^)

邊有人咁架﹗依家先出個馬蹄糕post﹗邊有人依家有興趣睇架﹗個個屋企都有啦﹗

做咩姐......(苦榮聲音演出)

可能......可能......可能有好多有心的blogger唔嫌棄呢~

又可能......可能人地d糕一早食哂想試下我呢款呢~~~

咪嘈啦﹗睇相~

我蒸左三底,幾驚衰啊~

今年的馬蹄粉無減價喎、馬蹄又唔平喎,蒸衰左真係肉都痛埋~

好在,成功﹗而且隻色比舊年果款好,因為我終於都落左生平最怕既吉士粉~

咁先有金金黃黃的色架嘛~~~

加埋阿年,係咪有番d新年feel呢?阿年年有魚呃嘛~

ok﹗試食結果顯示,凍食好煙un、煎香黎食會食到腳un un~~~

明日大年初一,祝大家牛年家家豐足、歲歲平安﹗恭喜恭喜~


yen | 24th Jan 2009 | 西式甜點 | (520 Reads)

讓大家久等了﹗

誕誕﹗係賀年凍糕

過年的年糕、馬蹄糕我都蒸左喇~(oh,年糕老早食哂、馬蹄糕就仲有一底)

芋頭糕依家蒸緊、蘿蔔糕之前吃了胡媽媽的私房版很滿足了

今次就介紹呢一款易到不得了、好味到不得了、受歡迎到不得了的......

<甜蜜蜜蜜桃蒟蒻>

yeah~又係用我阿姨送既果凍模,真係偉大﹗至靚啊~(用家有囍事程大嫂的語調)

今次份量剛好,口感好好、味道好好、蜜桃也用上地們牌(我地呢d平民,地們呢種貴價野$18.9@,真係好少買~hehe)

食得多糯米質地的糕,新年整番件呢d都咪話唔梳肝

材料﹕蒟蒻粉45克、蜜桃果汁1050ml、罐裝蜜桃(大size)1罐

做法﹕

(1) 蒟蒻粉以100ml的果汁開勻,與餘下的果汁混合後加熱至完全融解

(2) 將蜜桃按個人喜好切半或切件,先將溶液注入果凍模中,待半凝固後加入蜜桃及注入餘下的溶液;冷凍至凝固即可。

小撇步﹕蒟蒻要先開勻再加入果汁,否則擔保你成煲野變成一舊舊。

 

喂,今日已經係年廿九,仲有一日就過年;係度同大家拜個早年﹗

希望各位今年長煮長有、平平安安、身體健康﹗


Next