香港新浪網 MySinaBlog
yen | 31st Dec 2008 | 簡易晚餐 | (320 Reads)

呢個post係2008年12月28日晚上11:14上載的

時間關係,有時可能一整日都無時間update個post或者好幾日都無時間下廚

所以我習慣一有時間就預備多幾個post,再較個時間制,等佢定時自動更新

當大家睇到呢個post的時候,我估我應該忙緊整大除夕的食物(未知整咩,仲構思緊)

係08年快將成為歷史,2009迎面衝過來的當兒

我整左一個糯米飯

無他既,因為天氣涼涼地,糯米係最基本又唔貴的食材

就算係無蝦米、臘腸、花生米;只需要加一點帶甜的豉油同蔥,一樣好味到不得了

2009年,未必係一個百廢待興的年頭;但相信要加倍努力才能夠比較順利過渡吧

來﹗朋友,吃飽個肚再來打拚吧﹗

材料﹕糯米半斤、臘腸一孖、蝦米3湯匙、花生適量、甜豉油適量

做法﹕

(1) 糯米先洗淨浸水兩小時,臘腸汆水切粒置碟中、蝦米浸10分鐘瀝水同置碟中。

(2) 臘腸及蝦米隔水蒸10分鐘,燒熱1湯匙油爆香兩者,加入蒸碟內的汁同炒至汁乾。

(3) 糯米隔水蒸熟;煮甜豉油(生抽3湯匙+糖1湯匙;煮熱就ok)

(4) 熟糯米加步驟(2)的臘腸及蝦米撈勻,撓甜豉油及花生米,食時加入蔥花或芫茜。

小撇步﹕

(1) 蒸糯米飯期間不時翻撥讓糯米平均受熱,而且蒸前糯米需稍稍瀝乾水份,如注入水份一同蒸煮,就會令糯米糊口。

(2) 我用德腳寶的多習蒸爐蒸,要令糯米蒸熟只需20分鐘。

 

朋友,2009再見﹗


yen | 30th Dec 2008 | 簡易晚餐 | (215 Reads)

做冬果晚我整左一個差唔多架,不過色水重左d,又偏鹹~

最重要係,食完我先發覺原來我無落最重要果樣 -- 帶子仔

之但係我已經醃好左,無理由唔用,加上剩左兩條玉子豆腐

順理成章,整多個「帶子素翅燴豆腐」

今次我輕手左d,無用生抽老抽;所以味道剛好,好快就沽清了~

嘩﹗係咪好富貴咁先?過年整一味呢d,都見得下人架(重點係唔貴架hehe)

材料﹕素翅半碗(你鐘意食多d就落多d)、帶子一碗、蟹柳4條、玉子豆腐兩條

芡汁﹕鹽及糖各半茶匙、麻油及白胡椒各少許、水1/4杯、粟粉1茶匙

做法﹕

(1) 玉子豆腐切粗圓片,置碟中隔水蒸5分鐘,移往上桌用的碟子備用;帶子、蟹柳、素翅解凍;帶子先用份量之外的鹽及白胡椒醃十五至二十分鐘;蟹柳切粗粒或撕成粗絲;素翅下鑊之前先沖水

(2) 燒滾半鑊水,將帶子及蟹柳汆水,快手撈起瀝水備用

(3) 煮滾芡汁,所有材料回鑊煮至汁杰,就可以淋上玉子豆腐。

小撇步﹕

素翅在凍肉店有售,約$20一包;素翅原材料為魚膠,所以不易過早沖水,以免融化;入鑊前快手過水就ok喇。


yen | 29th Dec 2008 | 節日食譜 | (539 Reads)

聖誕節我們這一家都會開party做大食會

今年都唔例外,早兩三個星期老三老大已同我傾要整d咩食~

最後,我地過左一個飽到唔郁得既聖誕節~

陳媽媽整茶葉蛋,雖然新蛋唔係好上色,但都好好味啊~

焗薯餅,唔駛油炸,焗都好脆口又香......

pizza hut......一個pizza填飽好多人的肚子呢~多謝臻臻爸爸~

蒜蓉包again~老三幫手塗架~

陳媽媽整既好味咖哩魷魚魚旦蘿蔔,勁正......

幅相都寫左呢味野係咩呢~~

陳媽媽最知我地心......

老大的炒蜆......

oh,我平安夜晚整架,胡先生幫手整架~

係我想整好耐既熱情果mousse cake;酸酸地好開胃~

加埋christmas公仔,so christmas......

要食譜嗎?hehe......


yen | 28th Dec 2008 | 文字.碎碎唸 | (75 Reads)

之前有同事包班整「聖誕樹頭蛋糕」

同事係平安夜果日拎個蛋糕走,我地偷影左幾張相

以下係我覺得好christmas既一張~

同事幾個月前生左個bb,佢同佢老公都係基督徒,佢地既囡囡出生前就知道有兔唇烈顎的情況;最後,佢地都從天父的帶領下迎接呢個小生命的來臨。

佢地係我地同事之間公認的一個充滿愛的family!充滿平安、喜樂的家。爸爸媽媽都係好可愛好幽默的父母;我地都知道呢位小妹妹未來要接受好多手術同醫治,但願神一直與她們同在。

佢地都有一個blog,係佢地教會的姊妹幫手設計,小妹妹的爸爸主力update;有妹妹的照片;呢位妹妹,馮心嗂,係一位天父派來世上的小天使;如果大家有感動既,去佢地的blog度支持佢地呃~~

http://hk.myblog.yahoo.com/hazel-fung  (不一樣的天使!)

同場加映,藝術家給我的小禮物

仲有親筆簽名架,希望藝術家係新一年的來臨能夠得到天父的祝福,能夠開心d~


yen | 27th Dec 2008 | 簡易晚餐 | (438 Reads)

聖誕,你們快樂嗎?

平安夜晚上,我煮了一頓唔太豐富,卻很用心的聖誕餐~

今年我地無交換禮物,卻來得更自在

好,睇睇我煮左d乜~

呢張係胡先生影架,係蒜蓉包同橄欖麵包條

本來就好地地既,點知我交帶胡先生睇住d烘緊的包包,佢benz break啊~有部份over cook,真係太過份(嬲啊)好在,都仲好味......(送餐湯﹕羅宋湯)

呢個係橄欖麵包條,好味啊~參考大少奶的做法,勁﹗

come on,casesar salad again~~

前菜﹕千層薯仔片

做法﹕中間夾芝士同蕃茄醬,一層薯仔片、一層餡、一層薯仔片咁,最後係面放芝士同pasiley,180度焗到芝士溶就ok~(之前要將d薯仔片灼一灼先~)

小撇步﹕我會用牙簽咭實個千層薯仔片,因為芝士一溶會易位

前菜﹕海鹽帶子

做法﹕墊底既係用剩既薯仔片(唔好哂)、帶子係急凍既,洗淨去腸,用少少生抽、海鹽、料酒、白胡椒醃10分鐘,放係焗爐架180度焗10-15分鐘就ok~

主菜﹕蘋果醋燒牛肉片煮扁意粉

做法﹕呢個好易煮,煮熟左扁意粉,就預備燴汁(蘋果醋2-3湯匙、蜜糖2湯匙、鹽同胡椒少許、橙汁1茶匙、橙皮茸1茶匙);煮熱燴汁就落扁意粉拌勻,ok可以上碟

小撇步﹕橙汁唔好太多

甜品﹕蜜桃果凍

做法﹕果凍粉用2杯水煮至微滾,熄火後注入果凍模;加你喜歡的水果冷藏至凝固

好喇,希望你地都有個快樂的聖誕節

明日預告﹕聖誕party大食會匯報


yen | 26th Dec 2008 | 包點、曲奇 | (429 Reads)

花心思時間的料理,我認為就是沒有參與製作的人

只要用心去看一眼、嚐一口;廚子的祝福不難感受到吧?幸福就在此發生......

今年聖誕我決定不買任何現成的聖誕禮物送給我所愛的人

反而,更落力去實踐那個我這些年來的心願

整聖誕曲奇送給朋友仔

見到嗎?就係佢地喇,我仲懶細心咁用袋裝起,獨立包裝架~~

so christmas......

你地睇,好疊馬﹗

pack好哂就準備送比同事仔喇~


yen | 25th Dec 2008 | 文字.碎碎唸 | (59 Reads)

呵﹗呵呵﹗唔知咩原因,可能係性格、可能係我懶、可能係我太掛住屋企~

我好少出街,除左番工,我多數都係屋企

出Time Square?No Way~~(未逼過咩)

但兩個人相處,總不能夠單方面去遷就既

胡先生好就我,相信係無容置疑既~

咁我久不久都會良心發現地反遷就番佢既......

所以,我去左佢屋企附近~~即係Time Square喇﹗

真係好靚,好多地方的christmas decor都減budget下較去年遜色;但Time Square仲keep到啊;胡先生所以講「Time Square即係Time Square」-->好似佢有份咁(hehe)

Carrie Chau有exhibition

呢兩隻野......

胡先生之後帶我去食開心果雪糕

仲有我鐘意食的Rasberry Sorbet

最後仲買$5一盒的士多啤梨;經濟真係轉差了......


yen | 24th Dec 2008 | 包點、曲奇 | (399 Reads)

十二月某個週日上午,一班小朋友同家長一齊整聖誕樹頭蛋糕

而我就同同事仔做助手,導師當然係世外高人啦~~佢好勁架﹗

今次有10個家庭一齊整,我地個個都好忙

我一次過焗左十一個卷蛋、同事仔一次過打起左十一個樹頭蛋糕的朱古力面、我又一次過分左十一份材料(每份四隻蛋白、五隻蛋黃)......

總之果日就忙到甩look啦~不過導師教左我一樣焗卷蛋要注意既野,我會試下整一次卷蛋,希望成功啦﹗

呢個我覺十個學生當中整得最靚既樹頭蛋糕,我比8分(10分)


yen | 24th Dec 2008 | 文字.碎碎唸 | (117 Reads)

已經係2008年12月24日,平安夜連門都唔敲、不知不覺間到了~

係呢,你地今年仲有無錢、仲有時間、仲有心思、仲有關心你身邊的人需要什麼

係呢個送禮送到發瘋的年代,你是否已為你的至親送上祝福呢?

well......我有重要任務係身,所以今年一切都要從減~

減少買禮物、減少出外用餐、減少參加party(因為多數都要交換禮物的)

雖然係咁,但唔等於我無收到禮物既,而且都係一d實用又窩心的小品

呢個火槍我想要好耐架喇,不過一直都忍住唔買,過左生日、過左拍拖紀念日、過左重陽清明(關咩事?)......到聖誕,見到佢係網上訂購有優惠,我就捨棄了原本好想買的Agnes B袋,買左呢個更合我心意的廚具(哇,我覺得真係威喎!)

呢個係王曾氏送我的小玩意,你地知唔知係咩黎?

王曾氏話要打斜少少比你地睇,估到係咩嗎?佢的用途呢?

王曾氏又拎高fing比你地睇,有d頭緒無啊?

登登﹗係茶隔啊,我第一次見到王曾氏用的時候,佢就好好咁話幫我買;結果佢無收我錢,我就當係佢送比我的聖誕小玩意啦~0岩用﹗我都係茶怪黎架~(小心會有茶蹟)

哇﹗有燕窩食﹗當然係我的胡先生買比我架啦~

唔好誤會,其實佢平日都會買好多得意野比我食;唔係只有聖誕先有架~

陳意齋的燕窩糕每日即整;只可以keep兩至三日,而且都唔平~

一盒有六條~

好懷舊的紙質、字樣、色系,好鐘意~你睇佢d字~~

打開一睇,oh﹗好似雲片糕~

食左一半再影,的確係加左燕碎的雲片糕~

佢提早同我地講聖誕快樂~~


yen | 23rd Dec 2008 | 中式鹹點 | (261 Reads)

喂,聖誕快樂啊咁多位~

大家d公司啊、朋友啊、同學啊、屋企啊~有無開party開到傻?

我公司尋日就開左party,曾幾何時我地都試過呢d gathering,對上一次大胃王carrie都仲未調上總會架~~

因為太多野食,引誘到我無影到d食物的全相

到我記得既時候,只可以影到幾款野食咋~

主角﹕茶葉蛋

今次重手左,鹹左d,不過仍然好味~ 

當然係有我的「yen之孖寶」啦~

仲有食得既聖誕老人啦~不過無切開到,因為太飽食唔落,留番聽日喎~

仲有萍姐的木糠布甸,雖然唔似老三整果d,但都好好味啊,好似食緊雪糕咁~~

唔止有得食,鄭小姐仲送出多份禮物,我抽中其中一份;而最0岩我果份由王曾氏抽到;係咩?咪係一大袋零食囉~

see~我抽唔到食既,天父知我呢期指甲成日反,所以比呢支勁滋潤的cream比我;oh~我都買左一枝我覺得好好用又實惠的hand cream比個friend~

你地呢?收到咩得意禮物啊?不如聽日來一個有趣禮物篇呃?


Next