香港新浪網 MySinaBlog
yen | 30th Nov 2008 | 西式甜點 | (417 Reads)

天氣咁凍,又點估到我會整果凍呢?

其實無咩原因去整,想整就整lu~

呢款果凍係用洋菜粉整,我一直都唔知洋菜粉同大菜絲有咩分別

最後,我終於...........................都係唔知,好似差不多既野~

總之就係果d唔駛入雪櫃都可以凝固的神奇東西啦

一包洋菜粉+250ml水+適量冰糖,一齊煮滾就可以加埋水果一齊注入模冷藏

今次陳媽媽讚我將個士多啤梨整得好靚,仲要欣賞左一陣先食~

我用刀將個士多啤梨切成咁樣架~yeah~

天冷的時候,食一個果凍,就好似d人鐘意係好凍的時候食雪條一樣

可能都係為左過癮

食完最好攬下你愛既人......

天冷的時候,擁抱你所愛的感覺最窩心


yen | 29th Nov 2008 | 包點、曲奇 | (307 Reads)

呢個千層酥要整一d難度都無,因為今次我買現成酥皮嘛~(懶)

將酥皮回軟至可以切入的程度,就切出你所需的份量(睇你食幾多就切幾多啦~)

其餘未用既就要立即冷藏喇~

你地知唔知酥皮點解會一層層又鬆又酥呢?

因為麵皮與麵皮之間係比牛油隔住,點樣隔住?就係整酥皮時要摺好多摺既,就係咁樣一層隔住一層咁,成為大家食到的千層酥喇~

你地發唔發覺呢兩張相同以前我d相有少少唔同?

因為同藝術家傾起,佢話我d相係偏綠,然後佢教我幾個click,d相就唔同哂喇~

藝術家果然係勁啊﹗

酥皮回軟輾薄,然後切成三角型,180度焗至金黃色

中間放士多啤梨碎,食之前撒上糖粉就ok喇~


yen | 28th Nov 2008 | 包點、曲奇 | (157 Reads)

尋日同同事食lunch,經過生果店

竟然比我發現我夢寐以求的無花果,係新鮮的無花果呢~

大部份都已經熟透透,我揀左實正d既,$8@,我買左4個

私私縮扒要賣十幾蚊一個,唔知有咩分別呢~

今次用左黎整果撻

仲買左今年曾經當造的藍莓同士多啤梨

無花果的味道係有少少甜味,多汁,不過老三似乎唔多鐘意

我就覺得ok啦~個樣都幾juicy嘛......

吉士餡係二記度買既免煮吉士,50g吉士+125ml奶開勻就用得,方便又好味

撻皮可以參考我焗蛋撻的做法新鮮出爐~蛋撻


yen | 27th Nov 2008 | 文字.碎碎唸 | (65 Reads)

今日我night shift,行番公司的途中見到炒栗子的嬸嬸

聞到栗子的香味,想起今晚的冷清(office好少人),就買包暖笠笠的栗子安慰下自己

同事大部份都識得開栗子,藝術家就弱d......

栗子係一種好溫馨的食物,秋意漸濃的時份我先會食,涼風陣陣攬住包栗子

幸福就這樣發生

胡先生黎陪我食dinner,之後話想飲熱檸茶就去買番中心整

無紅茶就轉飲熱檸水......一樣sweet(^.^)

仲有焗比同事食既蛋撻,卓廷先生食完都話10分滿分啊﹗輝輝話個皮脆既,同出面唔同,好味﹗娟姐話一定會養到胡先生肥肥白白(依家都係啦~hehe)

最後,放工時去左公和食荳花同煎豆腐

個伙計將碗雪到成冰既豆花拎比人,又記錯哂d order,好在唔係發生係我身上,否則一定會翻轉佢鋪頭﹗

荳花好滑~不過個煎豆腐無咩味,唔好食得個樣~


yen | 26th Nov 2008 | 包點、曲奇 | (239 Reads)

之前都出過蛋撻的post,今次再出,咁就梗係有佢不一樣的地方啦

事源我的工作關係會做展翅的班主任

今次接觸的呢一班學生,無論性格或背景都與呢兩年的學生有好大的分別

開頭既時候都有d無奈,唔知點樣令佢地明白同吸收到我地想教既內容

第一日落堂後,我祈禱問天父,面對呢一班學生時WWJD?

後來幾日,我都好掛住班學生

突然發現其實routine的教學內容對佢地起唔到作用,係咪真係咁大獲呢?

教學為的又係咩呢?社工又係咩呢?

最後,我決定將routine的內容轉變一下,去思想佢地到底需要乜野......

一連幾日的相處令我發現,天父的確與我同在

關心佢地的生命比起完成任何routine內容更有意思

最後一堂係畢業的時候,我為每個學生都寫上祝福同鼓勵,希望佢地收到

仲做左一樣應該係展翅班好少會做既,教佢地整野食

佢地的作品,都算似模似樣呃~

唔買現成的野食,要佢地落手落腳去整(咁當然我已經預備哂d必要材料,佢地只係將d野mix埋一齊),希望佢地食番自己整既野,feel下佢地以為自己做唔到既野原來係做得到架,似乎都幾enjoy~

整起左另一份,今日會焗埋比d同事食~


yen | 25th Nov 2008 | 中式甜點 | (555 Reads)

天氣忽冷忽熱,仍無損我們這一家去BBQ的興致

係小欖遭受無理對待之後,我地就轉戰另一個機地

由3點B到6點幾,B到我同陳媽都口乾乾

去到屋企附近就食許仔,點知佢d野偷工減料

結果番到屋企就自己整鮮奶燉蛋

今次蒸老左少少,好在無減佢滑滑的口感(老三同陳媽食)

材料﹕蛋2隻、奶236ml、冰糖2-3小塊、水半杯

做法﹕糖+水煮融後放涼,蛋+奶拌勻後,再與糖水攪勻,隔水慢火蒸20分鐘就ok

小撇步﹕可加鍚紙係面,咁蒸出黎既多數都係滑甜蛋架喇~


yen | 24th Nov 2008 | 包點、曲奇 | (454 Reads)

呢款蛋糕係參考<自家製曲奇小蛋糕>的食譜做

well,結果好似係雞蛋糕多d......

已經照足份量同step做呢~

anyway~好味就得﹗同事食哂啊......哇哈哈!~~~

材料﹕蛋2隻(白同黃要分開)、黑糖10克、奶10克、olive oil 10克、低粉35克、粟粉5克

            糖20克

做法﹕

(1) 蛋白同糖打到企身(糖要係白已打起泡之後分次加入)

(2) 蛋黃+黑糖攪勻,加入牛奶、oil再攪勻;最後加入已篩好的粉類輕手拌勻

(3) 用膠刮將1/3的(1)加入(2)切拌至mixed

(4) 將(3)倒入(1)快手拌勻,注入小杯至8分滿,180度焗20mins就ok喇~

小撇步﹕

當我焗到一半個蛋糕頂已經出色喇,但糕又未熟,我就加張鍚紙d蛋糕面,咁就無事,出爐時色澤金黃又熟哂~


yen | 23rd Nov 2008 | 中式甜點 | (3304 Reads)

年頭整過自家製-糖漬桂花

一直都無用,最近突然好想食桂花,所以就整左呢個彈下彈下既桂花糕

放係個飯盒仔冷藏過夜,倒扣出黎就係咁滑du du

仲好通透tim......

材料﹕桂花糖1茶匙、魚膠粉15克、冰糖30克、水180ml

做法﹕

(1) 用份量入面的部份水開溶魚膠粉,剩餘的水就同冰糖一齊煮融

(2) 將桂花糖加入已煮融的糖水,最後逐少加入已開勻的魚膠,注入模具冷凍就ok

小撇步﹕

(1) 魚膠粉只要用室溫水開就唔會起粒粒,一樣會融

(2) 桂花糖係市面有售,不過難搵d,我鐘意自己整;你睇佢d色如果深d,即係年紀大醃得耐,味會濃d,不過一樣用得既~


yen | 22nd Nov 2008 | 簡易晚餐 | (285 Reads)

為左要玩個無油薯片機,胡先生陪我買左幾個薯仔

薯片整左兩round要收一收手,唔係食到滿面瘡

剩番一個薯仔就整個薯角食下

呢個薯角係參考大少奶本書的做法,兩個字,簡單﹗

只要將個薯仔連皮洗淨,切角,放係焗盤上臨上少許olive oil,用180度焗至金黃色就ok喇,食之前加d香草、鹽同黑椒

就咁食又得、配smoked salmon食又得,得左﹗


yen | 21st Nov 2008 | 簡易晚餐 | (170 Reads)

燒野食既時候,你地會唔會整鍚紙包煮d菇黎烘呢?

係烘啊,好少會直接燒既~~

我就好鐘意食呢d野,所以係屋企我都好想整~

今次終於都整到,仲係好豪氣咁一個人的午餐﹗

食焗舞菇﹗

先洗乾淨d舞菇,加d鹽同黑椒,最好比d蒜泥同olive oil

用鍚紙包住,180度焗10分鐘就食得﹗

睇住我最鐘意既食譜書、一邊嘆菇~

人生一大樂事


Next