香港新浪網 MySinaBlog
yen | 31st Aug 2008 | 簡易晚餐 | (544 Reads)

星期六同胡先生拍拖既時候行過凍肉店,結果入左好多貨,睇黎之後既post都會同我d雞腎、魷魚翼、軟殼蟹等等有關喇,大家會密切期待嗎?我就好期待喇﹗

今次整既就係其中一樣我地既戰利品,牛展﹗(請鼓掌,呢孖牛展要成四草野架﹗)

之前睇過蔡師奶本書、又睇過高師傅煮過,所以把心一橫就試整黎食,結果食味不俗,不過仲有好多進步既空間

陳媽媽、老三同胡先生都話好味,不過今次就八角味道重左,下次可以試下再較個汁應該就無得頂架喇﹗

材料﹕牛展一孖

汁﹕八角3粒、花椒1兩、老抽4湯匙、生抽4湯匙、冰糖一舊(中size)、鹽2湯匙、酒3湯匙

做法﹕

(1) 水煮滾,下牛展出水,撈起過冷河

(2) 汁料混和後加入牛展,注入水同煮起大滾,收慢火煮20分鐘;熄火放涼。

(3) 重覆步驟(2)達3-4次,將牛展連同汁料浸過夜;翌日吃之前再煮滾,即可切片供食。

小撇步﹕

(1) 步驟(1)及(2)的水份只需剛好蓋過牛展就可以了

(2) 牛展在解凍及沖淨後需刺多個小孔,這樣會更入味

(3) 有做法是將牛展一直燉煮至林身後,立即取出及於放涼後以保鮮紙包入雪櫃,食之前才取出切片的,這個做法我未做過,不過這個原理是想令牛展更爽口及保持肉汁,應該不錯吃的﹗下次我會試下呢個方法

(4) 吃剩既牛展可以冷藏於雪櫃,可保存2-3日


yen | 30th Aug 2008 | 中式甜點 | (2155 Reads)

我一直都好想整咖啡千層凍糕,鸚鵡比左一日假我,車干先生比左個食譜我

結果整左以下呢個我覺得只有50分既咖啡千層凍糕

剛好合格既原因係個味道偏苦、而且唔夠實正

不過有d層次都幾似樣,而且第一次整算係咁咯,下次再努力d先﹗

食譜參考自車干先生,份量上我已修正了(無我依家果舊咁苦架喇)

材料﹕咖啡粉25克、大滾熱水2.5杯、魚膠片40克、糖130克、忌廉100ml

做法﹕

(1) 咖啡粉+糖+大熱水攪拌,魚膠片浸凍水至軟身後加入咖啡液內攪拌至融解

(2) 將(1)分開兩份,一份加入忌廉攪勻;然後一層一層雪至凝固就可以了。

小撇步

(1) 咖啡粉盡量用三合一已調較好味道果d,因為今次我用齋咖啡粉,所以有d苦

(2) 要耐心d一層凝固哂再加一層,平均10分鐘就會凝固一層架喇~

鸚鵡攪到我屋企對面座山變成一片白檬檬~


yen | 29th Aug 2008 | 陳媽媽料理 | (242 Reads)

話說老三被馬術奧運拖累至日日都番唔到黎食飯,加上8月係佢既生日月,陳媽媽老早就約定全家人要係老三唯一一晚可以番黎食飯果晚同佢做生日﹗

由於通脹既原故,陳媽媽堅持自己煮,經濟實惠又乾淨,咁結果大家就睇到以下呢幾味好送喇~

同事濤濤見到呢張相就已經道出我地既感想「好味啊﹗」呢味係﹕酸甜蝦碌

跟住既係指定動作﹕蠔汁冬菇燴生菜

陳媽媽既白切雞,佢話蒸老左,我又唔覺;老三就老左lu~

登﹗登﹗係我同胡先生去買番黎既哈根帶優惠雪糕,有六個味道﹕芒果雪巴、提拉米蘇(呢個名好老土)、passion fruit with mango、抹茶、比利時朱古力、紅莓雪巴;一個字﹕正﹗


yen | 28th Aug 2008 | 包點、曲奇 | (400 Reads)

呢款鬆餅我係行二德惠時買既預拌粉,見佢話有埋蛋糕紙杯仔送埋,又未整過cookie and cream既鬆餅口味,所以就買黎試下囉~

well......把鬼啊把鬼啊~

你知嘛?果d紙杯仔既生命力仲弱過我條村d花(動物之森),一放個漿入去就扁哂,結果我把心一橫,用番哂自己d鬆餅紙杯,所以由18個小蛋糕變成四個正常size鬆餅

口感係so far so good啦,外脆內軟,享受double up(好似唔知咩廣告有句咁既野,有無blogger知道?請告之~)

最後既結論係,我唔會再買黎整,下次都係自己攪份量無咁嬲~


yen | 27th Aug 2008 | 文字.碎碎唸 | (69 Reads)

你地睇你地睇~呢盒朱古力我覺得比真係食得果d仲要靚~

係傻芬小姐今早送比我架,開心得我呃﹗

佢話其實整呢盒朱古力比整其他作品容易,但一睇到佢d針子就知道對我黎講係難度9.9

傻芬﹗你要加油,做個賢良淑德既好老婆啊~

同場加映陳家既賢妻良母陳媽媽買給我既豆花,好味﹗


yen | 26th Aug 2008 | 陳媽媽料理 | (469 Reads)

咪話我哂命,我都話「世上只有媽媽好、有媽的孩子像個包~~(國語版)」

陳媽媽今次整呢味野,樣樣都係我最鐘意食,炒埋一碟、色澤豐富,仲要味道一流,一開飯個個都攻呢碟野,希望快d再食到啦~

你地幫手比下分,鼓勵下陳媽媽啦~(10分滿分的話,你地比幾多分呢?)


yen | 25th Aug 2008 | 西式甜點 | (207 Reads)

呢個杯係胡先生買比我架,我最鐘意呢隻杯架喇~

佢圓嘟嘟既身形、攪笑既公仔,平時我唔捨得用架,不過今次整我最愛既OTea凍就無計啦~


yen | 24th Aug 2008 | 西式甜點 | (269 Reads)

實不相暪,我真係好鐘意飲檸茶走甜,雖然唔知邊個朋友講我知,原來飲得多會提早dimensia,不過我都唔理咁多,想飲就飲~~

我想用呢種飲品整果凍好耐架喇﹗今次終於的起心肝做起~(事源我mou係廚櫃前面睇下有無就到期既食材要用,又比我見到幾包紅茶包,又見到雪櫃有個檸檬,咁咪......咁咪......就咁囉~)

well,由於本人鐘意OTea走甜,所以是次果凍的味道係零甜味既~~(傻眼);不過以下介紹的食譜內我已加番糖份,大家可以按個人喜好再自行配方啦~

一點點黑色既唔係dirty,係茶葉黎架,都係我唔好,無過篩就注入模具......(滴汗)

材料﹕檸檬汁1個、紅茶包2個、蒟蒻粉30克、大滾熱水700ml、糖45克

做法﹕紅茶包先用大滾水焗出茶味及色,再混入糖至融,最後沖開蒟蒻粉,加入檸檬汁並攪至沒有粉粒,即可。

小撇步﹕如有茶葉碎,需過濾後再注入模具,會令外觀更好睇~


yen | 23rd Aug 2008 | 中式甜點 | (1340 Reads)

因為鸚鵡既原故,我整左糯米滋

之前整過雪花芒果卷、整過草餅、整過紅豆糯米滋,今次整呢個糯米滋加左芋頭味香油,就成為暗紫色香芋糯米滋,餡料係日式紅豆泥,正﹗好味﹗

材料﹕芋頭香油3滴、糯米粉130克、椰汁200克、糖65克、手粉適量、紅豆泥適量

做法﹕

(1) 除手粉及紅豆泥之外,所有材料勻和,置微波爐叮2分30秒,放至微暖待用。

(2) 紅豆泥搓成小圓球,將糯米團分成相若的小團,包入餡料,滾在手粉上成可。

小撇步﹕

(1) 手粉有現成出售,但我喜歡將粟粉白獲炒熱成為手粉,因為口感較細緻。

(2) 紅豆泥可在吉豬島十蚊店有售,這款較易搓成小團,如太濕可白獲略炒片刻,乾乾地易搓d~


yen | 22nd Aug 2008 | 文字.碎碎唸 | (99 Reads)

仲係九號,好似好耐都未見過九號風球喇~

上一次好勁既風係2003年既杜鵑,今次睇怕都係全年最勁既風lu~

今日你地做過咩野啊?我整左糯米滋同咖啡千層糕,遲d會post出黎比大家睇下架喇~

聽日會唔會因為隻鸚鵡既外圍雨帶而導致大風雨呢?


Next