以為天氣回暖，四點幾突然一陣凍風吹過凍到我打冷震

在天氣凍的時候做咩係最適合呢？

除左暖在被窩冬眠之外，開焗爐整蛋糕曲奇也是一個好主意

特別係凍又落雨的天氣，焗爐仲可以幫我整乾d毛巾仔

本來想整夏威夷果仁曲奇，因為...所以轉做呢款咖啡貝殼蛋糕

呢款蛋糕仔可以用沙拉油/橄欖油代替牛油溶液

所以就算...都可以整到

...即係咩呢？...即係牛油解唔切凍囉~^.^~

多謝傻芬幫我整左個logo公仔，以後可以放係相度喇~

材料﹕蛋2隻、黃糖40g、低根麵粉65g、咖啡粉8g、泡打粉2g、云尼拿油1/4茶匙、牛油溶液40g

做法﹕

(1) 蛋+糖拌勻，加入云尼拿油拌勻

(2) 粉類篩進步驟(1)拌至不見粉粒，最後加入牛油溶液拌成蛋糕漿

(3) 預熱焗爐170度，蛋糕漿注入貝殼蛋糕模至6分滿，焗10分鐘至蛋糕熟即可。

小撇步﹕

(1) 我用橄欖油代替牛油溶液，質地仲係非常鬆軟

(2) 焗爐個個爐火都唔一樣，大家要睇火啊~

在新居裡，已有聖誕裝飾

紅莓香氛在空氣中散發著淡淡的節日氣氛

還欠一點聖誕音樂......

冷空氣今年提早來了~

聖誕也提早來了......

祝聖誕快樂

一早收到通知老麥年尾壓軸換小丸子

我出名小丸子迷，點會唔出手呢？

一個開心樂園餐+$8換一隻

我對於其他十幾隻無咩感覺，隻隻都差唔多款

但特別版既和風小丸子就唔同講法

我換左喇~

你換左未？

仲有18日，大日子就黎喇~

每日望住個月曆就會諗番呢年半既經歷

老實講，預備結婚既朋友大多數可能同我地一樣

唔開心多過開心

實在有太多事唔到我地話事，錢用到倒水咁已經唔在講，預計到有d使費真係唔滴汗都唔得

我地好少為錢而有爭執，反而係一d生活瑣事、習慣上有唔少既磨擦

我好幸福，因為胡先生好順得人；所以多數有意見既係我......

多得胡先生既體諒、身邊好友既支持、家人既十卜；我先可以撐到今日

更加幸福的是，最後呢個幾月我感受到一些期待的快樂

可能日子越近，我發現好多野都可以settle喇，所以可以放手等自己唔好咁緊張

(都唔係唔緊張既，心情好但胃口差，可能都係緊張同壓力所致；都好既，當減肥囉)

最後呢十幾日我都係心情好時整下嫁女餅請客等自己轉移下視線、分散注意力

今晚整左mini咖啡杯子蛋糕w/chocolate chips

我好快手連整帶焗都係大半個鐘

因為我整mini size，一次過焗左十幾個

入哂盒好似好震撼咁

希望收到既人都食得開心啦~

知道有朋友想跟著試做看看，就請參閱以下食譜吧

材料﹕蛋2隻、黃糖80g、淡奶40g、低粉120g、泡打粉4g、咖啡粉(3合1)半包，約1湯匙、朱古力粒適量、牛油溶液30ml

做法﹕

(1) 蛋及糖拌勻，加入淡奶攪拌好

(2) 篩入低粉及泡打粉拌至不見粉粒，加入咖啡粉及牛油溶液拌至滑身

(3) 注入焗杯約半滿，在面頭放上朱古力粒，以180度焗15-20分鐘即可。

小撇步﹕朱古力粒應放在正中央及稍為按入，因烘焙時蛋糕會升高及外瀉

天氣轉涼，身子一向麻麻既我又凍病左

睇左醫生，休息兩天才可以番工

有時在家比番工更加忙，要陪小臻玩、亦要預備晚餐

但忙也是忙得很快樂的

今天早上忙著氹小臻番學(叻仔﹗終於唔喊喇﹗)

訓訓訓訓左一個上午，然後接小臻放學(其實幾好玩，見到小臻係班房走出黎呆呆地，一見到我就笑騎騎)

等小臻訓左我就可以休息......傍晚開始預備晚餐

本來出外吃的，臨時轉陣去我新居火鍋(據聞室外只有10度，凍到癲左)

看我的邊爐宴盛況(我無胃口，只係食左少少......)

先講呢個湯底，Encore左第三次

堅好飲﹗我今次用西施骨、大量蕃茄、蘿蔔及三點蟹去熬煮而成

鮮味到不得了~正!!!

唔少得調味拼盤

買到日本廣島生蠔，好甜好肥美

灼完都唔會縮太多，值得再買(大昌，$62.9一盒)

我幫佢解凍時有一陣好香好鮮既生蠔味，唔腥~

有傻芬上次幫我買既靚肥牛，好味~

當然要有必食既丸霸(咁多丸，我覺得可以稱霸囉~)

我買到芝士丸，咬開可以拉出芝士絲架~勁好味﹗

我地係食菜之人，點可以無油麥菜同塞米呢??

天氣凍影響左d菜既生長速度，加上個個打邊爐好多菜都貴左

所以食下菇都唔錯，唔駛野野剩係食菜既~

最後仲有芋絲同豆腐

其實仲有三點蟹同埋蝦，可惜影唔到佢地~

之但係咁既場面都好夠照啦~係咪？

在一個天氣涼了的日子

真的好想打個邊爐、暖在家裡看宮心計(haha)

出外走走，不難發現大街小巷、大小的商場都滿佈聖誕裝飾

就快到聖誕節，今年聖誕會否不一樣？

由於太多數量關係，我要將曲奇pack好方便胡先生拎(更新相片請看此post的最後段)

好事當然係一不離二架啦~

所以襯星期日好少少無咁忙，就快手整番d嫁女餅招呼朋友同事

今次整多d，留番d比媽媽(佢嫁女點可以無餅食？食餅有餅味......)

好鐘意呢種效果，我唔係用PS執架，係影既時候自己做既效果

真係下次自拍都要用呢招，當堂靚哂~

比番個真身大家睇下，今次整三款曲奇(兩款比較成功、另一款就未必人人0岩食)

(左)榛子曲奇、(中)Mocha chip、(右)小饅頭

小饅頭失手，焗到爆開(唔知以為笑口棗，聖誕未過就新年喇？)

不過味道唔差既，平實既甜味(唔會過甜，但唔係好味到停唔到口果種)

而榛子曲奇一向都係水準作，我唔擔心，但佢只係排第二......

咁第一位好明顯架啦~唔係要問啊？？

最受歡迎男歌手﹗唔係古巨基，係佢﹗

好期待啊，期待d咩？遲下你就知.....呵呵

pack好哂成座山咁~

後期我再焗多一袋栗子饅頭比胡先生

希望胡先生既好同事喜歡......

yeah﹗不枉我呢排成日去Circle K

終於換到隻鬆弛熊杯，本來想要隻雞仔杯，但都係鐘意呢隻藍

所以有機會先再換你喇雞仔......

見到有個男仔抽到jumbo啊~其實我都好想換......

決定結婚既時候，已經想定要整呢樣野黎做其中一款嫁女餅請同事食

籌備結婚既過程中，我好明白太多野唔到我地控制、我地話事~

但嫁女餅呢範野，我好有信心自製應該難唔到我

早幾日拜託阿仔同藝術家幫我拎餅請同事食

尋晚我就開工整第一轉既嫁女餅

我用番人地餅家既禮餅裝住，好似好勁咁款~

其實煎左十幾個，拎左d比胡先生同佢打氣、留起左一隻比老三做點心、又煎左一片比陳媽媽tea time

因為個pan有d問題，煎得唔算好好，但正因為咁我放更多心機去煎每一片餅；結果我覺得係見得人既，當然仍然有進步空間，只希望收禮既收到我想感謝佢地為我同胡先生高興既心意

我自己都食左一件，好味喎~(自己讚自己)

紅豆，綿密而且清甜；餅皮我加入蜜糖、黑糖，清甜而甘香

好好好喜歡呢份沉實既韻味

但願仍有時間去享受接著的24天，朋友，唔駛擔心我花時間去做嫁女餅，因為我十分享受這個過程呢~

今個星期六會傾回禮禮物既安排，希望順利做到合心儀既sample

是日將派帖比其他中心同事既重任交比珠珠

珠珠的確係一個不可多得既好同事、好朋友，雖然相識唔耐，但好信任佢；所以將呢個重任拜託佢

幾經波折，同事們終於都囍帖到手

聽聞同事對囍帖都一致好評

加上尋晚陳媽媽收到朋友既電話，話見到張帖相知上面係咪我小時候係荃灣影既相；見張帖能夠勾起佢地舊時的回憶、成為話題，我想講已經達到目的了~

其實由一開始搵藝術家幫忙設計囍帖，呢張帖既模樣已經係腦中塑造了，只係我唔識得表達，要麻煩藝術家修改一次又一次，佢無發我脾四不特止，仲好爽手幫我修訂而且四出搵報價、買禮封、襯色......

好好好多謝佢﹗你是最好的，你知道嗎？

收到囍帖既同事親友，下月六日記得早d到啊~